Нямецкія партыі падтрымалі беларускіх палітвязняў

Старшыня Сацыял-дэмакратычнай партыі Германіі Зігмар Габрыэль адзначыў, што вельмі заклапочаны сітуацыяй вакол кандыдата ў прэзідэнты Мікалая Статкевіча.

Зігмар Габрыэль перакананы, што «нягледзячы на ​​іншыя актуальныя і важныя падзеі ў свеце, сітуацыя ў Беларусі не будзе забытая ні немцамі, ні еўрапейцамі». Па словах лідэра нямецкіх сацыял-дэмакратаў, гэта «пазіцыя ўсіх партый Германіі», перадае «Радыё Свабода».

Лідэр нямецкіх сацыял-дэмакратаў паведаміў, што апошні раз бачыўся з Мікалаем Статкевічам ўвосень 2010, незадоўга да яго арышту.

«З таго часу, - працягвае Зігмар Габрыэль, - у мяне няма магчымасці падтрымліваць кантакт з ім напрамую. Ягоная дачка, якая жыве ў Германіі, рэгулярна інфармуе нас пра тое, як у яго справы. Яна таксама паведаміла нам, што Мікалай ведае пра тое, як шмат людзей у Германіі і Еўропе падтрымліваюць яго і іншых палітычных зняволеных. Гэтая падтрымка павінная працягвацца!»

Лідэр нямецкіх сацыял-дэмакратаў адзначыў, што яго вельмі турбуюць ўмовы, у якіх змяшчаецца ягоны беларускі калега:

«Я вельмі непакоюся за Мікалая Статкевіча. Умовы ўтрымання ў зняволенні ў калоніі ўжо былі вельмі жорсткімі. Некалькі месяцаў таму Статкевіч нават трапіў у лякарню. Таму навіна аб тым, што ўмовы ўтрымання палітвязня будуць яшчэ больш жорсткімі, выклікае ў мяне вялікую трывогу. Наведванні сваякоў цяпер практычна немагчымыя. Я заклікаю ўлады Беларусі неадкладна адмяніць прысуд».

Адказваючы на ​​пытанне, як ён ацэньвае міжнародную рэакцыю на цяперашнюю сітуацыю ў Беларусі, ці не лічыць ён, што яна саслабла, Зігмар Габрыэль адзначыў: «рэакцыя толькі адна - гэта больш не можа працягвацца».

«У дзень прэзідэнцкіх выбараў у снежні 2010 года былі збітыя і кінутыя за краты тыя, хто з мужнасцю і перакананасцю змагаўся за вольныя выбары. Цяпер, як паказвае сітуацыя з праваабаронцам Алесем Бяляцкім, рэпрэсіі супраць апазіцыі і грамадзянскай супольнасці працягваюцца.

Міжнародная супольнасць вельмі адназначна і дакладна сказала, што «гэта не можа працягвацца». Былі ўведзеныя першыя санкцыі супраць адказных чыноўнікаў, і адначасова пачаты пошук шляхоў падтрымкі грамадзянскай супольнасці. З тых часоў палітычны ціск і дапамога грамадзянскай супольнасці былі павялічаныя ў некалькі разоў.

Нягледзячы на ​​іншыя актуальныя і важныя падзеі ў свеце, я не бачу, каб сітуацыя ў Беларусі была забытая. Наадварот, Германія і Еўропа будуць працягваць настойваць на вызваленні палітычных зняволеных і захаванні правоў чалавека. Дарэчы, гэта агульная пазіцыя ўсіх партый Германіі», - кажа Зігмара Габрыэль.

Зігмара Габрыэля нямецкія журналісты называюць адным з самых перспектыўных патэнцыйных кандыдатаў на пасаду бундэскацлера.