Штэфан Фюле падтрымаў «Вясну»

Еўрапейскі камісар па пытаннях пашырэння і палітыкі добрасуседства сустрэўся з намеснікам старшыні ПЦ «Вясна» Валянцінам Стэфановічам.

Фюле яшчэ раз выказаў падтрымку мужнай працы праваабаронцаў Беларусі, піша ПЦ «Вясна».

Еўракамісар выказаў занепакоенасць з нагоды палітычна матываваных пераследаў Праваабарончага цэнтра «Вясна».

Сустрэча адбылася адразу пасля таго, як Менскі гарадскі суд адмовіўся задаволіць касацыйную скаргу старшыні «Вясны», віцэ-прэзідэнта Міжнароднай Федэрацыі правоў чалавека Алеся Бяляцкага.

Кіраўнік праваабарончага цэнтру «Вясна» Алесь Бяляцкі асуджаны на 4,5 гады турмы ў лістападзе мінулага года. Яго прызналі вінаватым у нявыплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на свае рахункі, выдаткоўваў на праваабарончую дзейнасць.

Падставай для крымінальнага пераследу Бяляцкага стала інфармацыя аб банкаўскіх рахунках, якую перадалі афіцыйнаму Менску Літва і Польшча.

Бяляцкі знаходзіцца ў жодзінскай турме.

Краіны Еўразвяза, ЗША і міжнародныя праваабарончыя арганізацыі лічаць Бяляцкага палітвязнем, а прысуд яму - палітычна матываваным. Яны патрабуюць ад уладаў Беларусі вызваліць праваабаронца.