КДБ павінен быць прызнаны злачыннай арганізацыяй

Еўропа павінная спыніць займацца «заклёнамі» - супраць дыктатуры трэба ўводзіць санкцыі.

Былыя палітвязні, актывісты каманды кандыдата ў прэзідэнты Андрэя Саннікава ў сувязі з беспрэцэдэнтным ціскам на палітвязня правялі ў Варшаве прэс-канферэнцыю. У мерапрыемстве прынялі ўдзел кіраўнік выбарчага штаба Андрэя Саннікава Уладзімір Кобец, прэс-сакратар кандыдата ў прэзідэнты Аляксандр Атрошчанкаў, рэдактарка ​​сайта charter97.org Наталля Радзіна і першы кіраўнік незалежнай Беларусі Станіслаў Шушкевіч.

«Некалькі месяцаў мы не ведалі, што адбываецца з Андрэем Саннікавым. Нарэшце, ён змог на спатканні з жонкай распавесці, як над ім здзекуюцца. Гэтая інфармацыя выклікае шок і прымушае баяцца за ягонае жыццё. Андрэй падвяргаўся катаванням, спецслужбы пагражалі забіць ягоных жонку і сына. Шляхам беспрэцэдэнтнага ціску яго прымусілі напісаць прашэнне аб памілаванні. Што адбывалася ўсе тры месяцы невядома, ён па-ранейшаму знаходзіцца ў ізаляцыі і не можа распаввесці, як над ім здзекаваліся. Чаму Саннікава нікому не паказвалі тры месяцы? Ці не таму, што трэба было схаваць сляды катаванняў? Беларускі КДБ - гэта сучаснае гестапа. Гэта злачынная арганізацыя. Кожны з нас, хто быў у турме КДБ, ведае гэта на ўласным досведзе», - сказаў Уладзімір Кобец.

Аляксандр Атрошчанкаў распавёў аб уласным досведзе: што такое беларуская турма, этапаванні, катаванні і пагрозы.

«Вам цяжка нават уявіць прэсінг, якому падвяргаюцца палітвязні. Андрэя Саннікава дапытваў сам старшыня КДБ і пагражаў забойствам ягоным жонцы і сыну. Але Саннікаў ніякіх папер не падпісаў. Тое, што з ім адбывалася пасля верасня 2011 года - гэта страшна. У верасні яго перакінулі з Наваполацкай калоніі спачатку ў Віцебскую турму, потым у Магілёўскую турму, потым у Бабруйскую калонію, потым зноў у Магілёўскую турму і, нарэшце, у калонію «Віцьба-3». Што такое этап? Я вам распавяду. Этап - гэта стаяць гадзінамі на холадзе ў асяроддзі людзей са зброяй і нацкаванымі на цябе сабакамі. Ахова гатовая страляць у цябе без папярэджання, калі раптам ты нешта зробіш не так, як ім трэба. Потым гучыць загад бегчы бягом на святло. І ты бяжыш на гэтае святло, якое слепіць табе вочы, спатыкаешся, падаеш, губляеш тыя нешматлікія пажыткі, што ўзяў з сабой у турму... Потым едзеш у вагоне, набітым людзьмі. Ты нават не стаіш у ім, а вісіш ў шчыльным асяроддзі людзей, некаторыя з якіх хворыя на сухоты... Гэта больш страшна, чым я распавядаю. Мне пашанцавала - мой этап доўжыўся адзін дзень, а Андрэя этапавалі па параўнальна маленькай Беларусі з адной турмы ў іншую тыднямі...», - распавёў Аляксандр Атрошчанкаў.

Рэдактарка ​​сайта charter97.org Наталля Радзіна адзначыла, што яе цалкам не здзівілі метады, якія КДБ ўжываў у дачыненні да Андрэя Саннікава.

«Сітуацыя паказальная. Гэта прыклад таго, наколькі подлая і бесчалавечная ў Беларусі ўлада. Мне таксама пагражалі, што я сяду на пяць гадоў і, калі выйду з калоніі, не змагу мець дзяцей. Але самае гнюснае іншае. Так ціснулі на палітвязняў яшчэ ў савецкія часы. Сумленнаму і высакароднаму чалавеку прасцей памерці самому, але невыносна нават уявіць, што будзе прычыненая шкода ягоным блізкім - маці, жонцы, дзецям. Я заклікаю журналістаў разумець, што галоўнае - як здзекаваліся над Саннікавым, калі ён падпісаў нічога не значныя паперкі. Разумець і крычаць на ўвесь свет, што ў Беларусі забіваюць палітвязняў у турмах. Мяне патрэслі нядаўнія словы палітвязня Зміцера Бандарэнкі. Ён сказаў, што адчувае сябе ўдзельнікам шоў «За шклом». Гэта і адбываецца. Над палітвязнямі здзекуюцца, іхнім жыццям пагражае рэальная небяспека, а мы і свет моўчкі назіраем за гэтым. Не верце палітыкам, якія кажуць, што стратэгія санкцый у дачыненні да Беларусі «не спрацавала». Не было да гэтага часу ніякіх рэальных санкцый з боку Еўропы ў дачыненні да беларускай дыктатуры. Хоць рэальныя эканамічныя рычагі, а менавіта эмбарга на пастаўку нафтапрадуктаў, змогуць ацвярозіць дыктатара і прымусіць яго вызваліць закладнікаў. Давайце ратаваць палітвязняў, пакуль яны яшчэ жывыя», - сказала Наталля Радзіна.

Першы кіраўнік незалежнай Беларусі Станіслаў Шушкевіч заявіў, што ён салідарны з выступамі удзельнікаў прэс-канферэнцыі і заявіў, што «Лукашэнка - гэта садыст, які прагне крыві». Па ягоных словах, спыніць яго змогуць толькі рашучыя дзеянні, а не «заклёны», якія паўтараюць вось ужо амаль 18 гадоў еўрапейскія палітыкі.