Дэвід Кэмеран: Страсбургскі суд павінен прыцягнуць беларускі ўрад да адказу

Брытанскі прэм'ер папракнуў Менск у жорсткасці да апазіцыі.

Прэм'ер-міністр Вялікабрытаніі Дэвід Кэмеран, выступаючы 25 студзеня ў Страсбургу на паседжанні Рады Еўропы па пытанні рэфармавання Еўрапейскага суда па правах чалавека, папракнуў беларускія ўлады ў жорсткасці і парушэнні правоў прадстаўнікоў апазіцыі. Брытанскі прэм'ер лічыць, што Рады Еўропы і яе органы павінныя рэагаваць на гэтыя факты, піша «Тэлеграф».

«Мы павінныя памятаць, што тыранія і жорсткасць - гэта не проста факты з мінулага Еўропы. У той час як мы сядзім тут сёння, у Беларусі людзей кідаюць у турму за іхнія палітычныя перакананні. Галасы дысідэнтаў заглушаюцца, а іхнія правы парушаюцца.Тое, што адбываецца менш чым за тысячу кіламетраў адсюль, падкрэслівае нязменную важнасць і актуальнасць Рады Еўропы, Канвенцыі і Суда», - адзначыў Дэвід Кэмеран.

На думку брытанскага прэм'ера, сітуацыя ў Беларусі нагадвае сябрам Рады Еўропы аб тым, што сёння больш чым некалі еўрапейская супольнасць мае патрэбу ў дапамозе Еўрапейскага суда па правах чалавека як арыентыру для праваабаронцаў. У той жа час, па словах Дэвіда Кэмерана, сёння роля абаронцы правоў чалавека Страсбургскага суду ставіцца пад сумнеў.

«Абарона і садзейнічанне ў захаванні правоў чалавека - гэта не тое, што ўрады і суды могуць адолець у адзіночку. Усё супольства павіннае быць ўцягнутае ў гэты працэс », - заявіў Дэвід Кэмеран. Пры гэтым ён падкрэсліў, што лічыць правільным сітуацыю, калі Страсбургскі суд ўмешваецца ў сітуацыю, калі ўлады якой-небудзь краіны парушаюць правы чалавека, і прыцягвае ўрад да адказу.

Нагадаем, у цяперашні час у месцах пазбаўлення волі ў Беларусі па-ранейшаму застаюцца палітычныя апаненты Лукашэнкі, асуджаныя па «справе 19 снежня». У іх ліку - кандыдаты ў прэзідэнты Мікалай Статкевіч і Андрэй Саннікаў, каардынатар грамадзянскай кампаніі «Еўрапейская Беларусь» Зміцер Бандарэнка, а таксама сустаршыня аргкамітэта па стварэнні партыі «Беларуская хрысціянская дэмакратыя» Павел Севярынец.

Родныя і адвакаты зняволеных апазіцыянераў неаднаразова заяўлялі аб тым, што на фігурантаў «справы 19 снежня» увесь час здзяйсняецца ціск. У апошні час, па іхніх словах, гэта ціск узмацніўся на фоне бесперапынных патрабаванняў вызваліць апазіцыянераў з боку Захаду і міжнародных праваабарончых арганізацый.

Так, як паведаміла жонка Андрэя Саннікава Ірына Халіп, з лістапада 2011 года з апазіцыянера праз катаванні і пагрозы спрабавалі выбіць прашэнне на імя Лукашэнкі.