Дыктатар нацыяналізуе «Камунарку» і «Спартак»

Лукашэнка загадаў ліквідаваць назіральныя саветы на двух беларускіх кандытарскіх прадпрыемствах - ААТ «Спартак» і ААТ «Камунарка».

Адпаведнае ўказанне было дадзена ў ходзе выязной нарады (на Камунарцы) па пытанні развіцця кандытарскай галіны Беларусі, піша АФН.

Лукашэнка нагадаў, што даручаў «вельмі сур'ёзна прааналізаваць усе, што адбывалася на гэтых прадпрыемствах, пачынаючы з савецкіх часоў: як яны прыватызаваліся, да каго яны трапілі ў рукі, як ацэньваліся, - і прыняць рашэнне ў судзе».

«Суд прыняў рашэнне. Рашэнне суда не выканаў хто? Назіральныя саветы. З заўтрашняга дня назіральныя саветы ліквідаваць», - запатрабаваў беларускі кіраўнік.

«Рашэнні суда безумоўна павінны выконвацца, а потым вы маеце права іх абскардзіць», - дадаў ён.

«Маё рашэнне адназначнае, не гледзячы ні на якіх інвестараў і інвестыцыйны клімат. Таму з заўтрашняга дня прадпрыемствы павінны функцыянаваць так, як раней. Я пакуль яшчэ не кажу пра долі акцый, адсоткі, інвестараў - я проста пакуль кажу аб кіраванні прадпрыемствамі. З заўтрашняга дня кіраўнікі прадпрыемстваў прымаюць рашэнне аднаасобна, як дзяржпрадпрыемствы, забыўшыся пра тое, што ў іх калісьці быў назіральны савет», - заявіў Лукашэнка.

Кіраўнік заявіў, што нядаўна яму, «падкінулі» ліст, у якім напісана пра тое, што чыноўнікі хочуць прадаць фабрыкі, улічваючы асабістыя інтарэсы, перадае «Інтэрфакс».

Цытуючы дадзены ліст, Лукашэнка прывёў словы пра тое, што «сквапныя беларускія алігархі хочуць захапіць «Камунарку» і «Спартак», у лісце прысутнічае намёк на тое, што «гэта неяк можа нашкодзіць або станоўча адбіцца на інвестыцыйным клімаце». «Гэты шантаж мне не новы: інвестыцыйны клімат мяне турбуе, але толькі не за кошт дзяржавы і беларускага народа», - заявіў Лукашэнка.

Кіраўнік падкрэсліў, што «у нас падобныя прадпрыемствы ніколі немагчыма будзе прыватызаваць без згоды прэзідэнта. Запомніце гэта раз і назаўсёды». «Таму пісаць пра тое, што нейкія там чыноўнікі ў асабістых мэтах чагосьці хочуць, не варта. Як класік казаў: «хацелак у нас шмат». «Хацець нікому не шкодна. Хай хочуць - гэта не забараняецца» - заявіў ён.