Уладзімір Лабковіч: Гэта вялікі гонар для нас

Прысваенне звання Алесю Бяляцкаму ганаровага грамадзяніна Парыжа - гэта прызнанне ўсіх беларускіх праваабаронцаў, лічыць эксперт.

«Гэта, безумоўна, вялікі гонар і пашана мужнасці Алеся Бяляцкага і яго дзейнасці ў апошнія дзесяцігоддзі ў сферы абароны праў чалавека і рэпрэсаваных беларусаў», - сказаў у інтэрв'ю сайту charter97.org сябра савета праваабарончага цэнтра «Вясна» Уладзімір Лабковіч.

Па словах праваабаронцы, ПЦ «Вясна» высока цэніць прызнанне мэрыі Парыжа:

«Для нас гэта вялікі гонар і мы з вялікай удзячнасцю прымаем рашэнне мэрыі Парыжа зрабіць Алеся Бяляцкага ганаровым грамадзянінам французскай сталіцы».

Гэта прызнанне не толькі Бяляцкага, але і ўсіх беларускіх праваабаронцаў, лічыць Уладзімір Лабковіч. «Гэта не толькі прызнанне заслуг Алеся Бяляцкага за яго адданую і бескарыслівую дапамогу беларускай грамадзянскай супольнасці, але і прызнанне для ўсіх беларускіх праваабаронцаў, якія абараняюць правы чалавека ў такіх цяжкіх умовах у нашай краіне», - адзначыў праваабаронца.

Нагадаем, сёння стала вядома, што беларускаму праваабаронцу і палітвязню Алесю Бяляцкаму прысвоена званне ганаровага грамадзяніна Парыжа. Такое рашэнне было прынята гарадскім саветам па прапанове мэра французскай сталіцы. Ініцыятыва зыходзіла ад савета мэрыі 11-й акругі Парыжа.