Карупцыйны скандал на БМЗ

Службовыя асобы падазраюцца ў атрыманні буйных хабараў за лабіраванне інтарэсаў камерцыйнай кампаніі.

Аператыўныя мерапрыемствы па выяўленні карупцыі на буйным прадпрыемстве былі праведзены супрацоўнікамі Упраўлення КДБ па Гомельскай вобласці. У поле зроку праваахоўных органаў трапілі начальнік трубапракатнай вытворчасці і яго брат, які займаў на заводзе пасаду начальніка ўпраўлення камплектацыі абсталявання, піша «Ежедневник».

Па дадзеных праваахоўных органаў, падазраваныя, якія дзейнічалі сумесна і па папярэдняй змове, з канца 2009 года і па кастрычнік 2010 года атрымалі ад прадстаўніка камерцыйнай кампаніі, якая займаецца вырабам абсталявання розных груп складанасці, хабар у памеры 38 тысяч даляраў.

За гэтыя грошы два браты пралабіравалі інтарэсы камерцыйнай кампаніі, у выніку чаго ААТ «БМЗ» заключыла з ёй у розны час тры дамовы на пастаўку партыі прашыўных аправак для кранавага абсталявання завода.

На думку аператыўнікаў, грошы службовым асобам былі прадастаўлены выключна ў сувязі з займаемым імі службовым становішчам на ААТ «БМЗ», за спрыяльнае рашэнне пытанняў, якія ўваходзяць у іх кампетэнцыю.

Па дадзеным факце Упраўленнем Следчага камітэта па Гомельскай вобласці ў дачыненні да службовых асоб ААТ «БМЗ» узбуджаная крымінальная справа па ч.3 арт.430 (атрыманне хабару, здзейсненае ў асабліва буйным памеры, альбо арганізаванай групай, альбо асобай, якая займае адказнае становішча) Крымінальнага кодэкса Беларусі. Ёсць звесткі, што гэта быў не адзіны выпадак, калі два брата за грошы лабіравалі інтарэсы камерцыйных структур на БМЗ. Вядзецца расследаванне.

Гэта ўжо другая крымінальная справа, якая ўзбуджана ў адносінах да службовых асоб ААТ «БМЗ» за апошнія два месяцы. У пачатку верасня УСК па Гомельскай вобласці ўзбудзіла крымінальную справу ў дачыненні да начальніка трубапракатнага цэха ААТ «Беларускі металургічны завод», інкрымінаваўшы яму па ч.1 арт.14, ч.3 арт.210 КК (замах на крадзеж шляхам злоўжывання службовымі паўнамоцтвамі, здзейснены групай асоб па папярэдняй змове ў буйным памеры) Крымінальнага кодэкса Беларусі.