Выбаркам «не змог» праверыць факт галасавання мерцвякоў

Праваабаронца Алег Мацкевіч з Барысава атрымаў «геніяльны» адказ на сваю скаргу аб парушэннях пры арганізацыі галасавання на даму.

Адказ на скаргу падпісаў старшыня акруговай выбарчай камісіі Барысаўскай гарадскога выбарчай акругі № 62 Васіль Бараннік, піша ПЦ «Вясна».

«Вывучыўшы тлумачальную старшыні ўчастковай выбарчай камісіі для галасавання № 9 Завацкага Андрэя Андрэевіча, акруговая выбарчая камісія Барысаўскай гарадской выбарчай акругі № 62 паведамляе, што ўчастковая камісія ўчастка для галасавання забяспечыла магчымасць, згодна з арт. 52 Выбарчага кодэкса Рэспублікі Беларусь, удзельнічаць у галасаванні выбаршчыкаў, якія па стане здароўя або іншых уважлівых прычынах не змаглі прыйсці ў дзень выбараў на ўчастак для галасавання. Названыя вамі выпадкі парушэння арт. 54 Выбарчага кодэкса РБ праверыць не ўяўляецца магчымым, так як вамі не ўказаны канкрэтныя прозвішчы і адрасы выбаршчыкаў, у дачыненні да якіх, на вашу думку, былі дапушчаныя парушэнні з боку ўчастковай камісіі», - напісана ў адказе праваабаронцу Алегу Мацкевічу.

На самой справе, праверыць, хто выклікаў на дом членаў камісіі, а хто - не, было даволі проста. У сваёй скарзе Мацкевіч паказаў, што з 10 раніцы да 13.30 скрыню для галасавання прывозілі да дваіх выбаршчыкаў, якія не маглі выклікаць членаў камісіі на дом, таму што знаходзіліся ў несвядомым стане; да трох, якія апынуліся памерлымі; да пецярых, якія адкрыта сказалі, што камісію на дом не выклікалі; да адзінаццаці, якіх наогул не аказалася дома; да трох, якія выехалі з месца жыхарства; яшчэ да шаснаццаці, якія на той момант ужо прагаласавалі ў памяшканні ўчастка. Але нават такія відавочныя факты ў нашай краіне «немагчыма» і няма каму праверыць.

Нагадаем, што ўсе праўладныя кандыдаты ўжо абвешчаныя пераможцамі. Вынікі «выбараў» зацверджаны, у шэрагу выпадкаў нават без фармальнага разгляду скаргаў назіральнікаў.