Валерый Костка: Будуць хаваць, мала якія там акалічнасці

У КДБ не пацвярджаюць інфармацыю аб тым, што быў застрэлены ці застрэліўся палкоўнік, які працаваў у цэнтральным апараце КДБ.

Паведамленні аб гэтым інцыдэнце з'явіліся ў незалежных СМІ.

Паводле інфармацыі сайта charter97.org, быў застрэлены палкоўнік, які працаваў у цэнтральным апараце КДБ і адказваў за эканамічны напрамак. Афіцыйна гэтая інфармацыя не пацвярджаецца. Начальнік цэнтра інфармацыі і грамадскіх сувязей КДБ Аляксандр Антановіч заявіў «Радыё Свабода»:

«Можаце прывесці мае словы. На жаль, больш нічога не скажу з гэтай нагоды - гэта чарговы ілжывы правакацыйны ўкід. І рэагаваць на кожны з іх і каментаваць мы не маем намеру».

Па словах рэдактара сайта charter97.org Наталлі Радзінай, падрабязнасці адносна палкоўніка КДБ працягваюць паступаць з крыніц, якія яна пакуль не раскрывае:

«Паступае інфармацыя ад абсалютна розных крыніц, што было самагубства ці забойства ў КДБ, менавіта сярод высокапастаўленых супрацоўнікаў. Па апошняй інфармацыі, гэта палкоўнік Казак, гэта эканамічны напрамак, адвядзенне зямель на продаж і іншыя эканамічныя справы. Па апошняй інфармацыі, быў забіты ў сваёй хаце, каля Менска».

У тым, што афіцыйна КДБ аспрэчвае гэтую інфармацыю, Наталля Радзіна не бачыць нічога дзіўнага:

«Гэта натуральна, КДБ - закрытая структура, якая працуе па савецкіх лякалах. Я гэта магу сказаць, як чалавек, які быў у турме КДБ. І натуральна, што такая інфармацыя заўсёды будзе зачыненая. Але тое, што гэтая інфармацыя паступае не толькі сайту charter97.org, але і тэлеканалу «Белсат», і крыніцы розныя, наколькі я разумею, і ў прынцыпе яны даюць падобную інфармацыю, - кажа пра тое, што няма дыму без агню».

Наталля Радзіна сказала, што крыніцы інфармацыі яна раскрыць не можа:

«У дыктатарскай краіне такую інфармацыю могуць паведамляць толькі ананімныя крыніцы, так як гэтыя людзі хочуць жыць. Я ўжо не кажу пра тое, каб захаваць працу».

Не змог пацвердзіць гэтую інфармацыю і былы ваенны выведнік, падпалкоўнік КДБ у адстаўцы Валерый Костка. Але ён дапускае, што афіцыйна падобную інфармацыю могуць не раскрываць:

«Ну, так будуць хаваць, мала якія там акалічнасці. Ніхто ж не ведае, самі зразумейце. Але ў мяне прынцып такі: калі нешта звязана са смерцю, то я гэта імкнуся не каментаваць, так як у адных гэта радасць выклікае - вось генерал КДБ застрэліўся. Але ў яго ёсць сваякі, а для іх жа гэта трагедыя».

На Маскоўскіх могілках у Менску сказалі, што ў апошні час там не хавалі палкоўніка ці генерала з прозвішчам Казак. У канцы верасня там пахавалі генерал-маёра Вячаслава Яўстаф'ева.