Алігарх Чыж скупляе Беларусь

Журналісты вывучылі, якія актывы плануе набыць «кашалёк» Лукашэнкі.

Юрый Чыж, які мае забарону на ўезд на тэрыторыю Еўразвяза, з'яўляецца старшынёй савета дырэктараў групы кампаній «Трайпл». У склад яго актываў ўваходзяць СЗАТ «Трайплэнерга», ТДА «Белнафтагаз», СТАА «Нафтахімтрэйдзінг», СП ТАА «Неанафта», СТАА «Варыянт», СП ТАА «Трайпл-Тэхна», СТАА «Трайпл-Дэкор», СЗАТ «Кварцмелпрам» , ААТ «Бярозаўскі камбінат сілікатных вырабаў», СП ТАА «Акватрайпл», ТАА «Ракаўскі бровар», ГСАК «Лагойск», ЗАТ ФК «Дынама-Менск», рэстараны «У Францыска», «Гасцiны двор», крама Tom Tailor і буцік Corneliani, піша «Салідарнасць».

Аднак бізнесмену гэтага аказалася мала. У гэтым годзе ён вёў актыўную дзейнасць адразу па некалькіх напрамках.

НАБЫЎ ЦІ ПЛАНУЕ НАБЫЦЬ

Вёска Сабалі

У жніўні Аляксандр Лукашэнка падарыў Юрыю Чыжу яго родную вёску. Паводле ўказу Лукашэнкі, ва ўласнасць ТАА «Трайпл» і іншых кампаній бізнесмена Юрыя Чыжа перададзена 333 гектара яго роднай вёскі Сабалі для стварэння турыстычнага культурна-этнаграфічнага комплексу «Наш родны кут Сабалi».

Па заяве прадстаўніка Міністэрства спорту і турызму, «Трайпл» выдаткуе на будаўніцтва комплексу $ 15 млн. да 2015 года.

Піўзавод «Крыніца»

Юрый Чыж прапанаваў ураду прадаць яму піваварны завод «Крыніца». Прадпрыемства ў апошні час знаходзіцца ў складаным фінансавым становішчы. Абаротных сродкаў не хапала і, каб разлічыцца па доўгатэрміновых крэдытах, даводзілася браць па высокіх адсоткавых ставак кароткатэрміновыя крэдытныя рэсурсы.

Па інфармацыі «Завтра твоей страны», рашэнне уладаў аб перадачы ўладальніку «Трайпла» кантрольнага пакета акцый завода праходзіць апошнія стадыі ўзгаднення.

Праект указа прадугледжвае продаж кампаніі «Трайпл» 25% акцый «Крыніцы». Астатнюю частку дзяржпакета акцый кампанія «Трайпл» атрымае ў давернае кіраванне.

Юрый Чыж носіць гадзіннік даражэй 400 тысяч даляраў, паведаміла год назад «Наша Ніва». Circus Minute Repeater (749-80) мае плацінавы корпус, цыферблат з чорнага оніксу і белага золата, а таксама раменьчык са шкуры алігатара з плацінавай устаўкай

Першы менскі хлебазавод

Улады Менска абвясцілі конкурс па продажы хлебазавода № 1. Найстарэйшую хлебапякарню сталіцы плануецца прадаць як маёмасны комплекс. Конкурс намечана правесці 29 снежня. Зрэшты, на менскім хлебазаводзе сцвярджаюць, што імя пакупніка ўжо вядома.

Супрацоўнікі хлебазавода ўпэўненыя, што іх «новым гаспадаром стане Чыж». У кіраўніка групы кампаній «Трайпл» непадалёк знаходзіцца рэстаран-бровар «Ракаўскі Бровар».

Менскі завод пеністых він

Юрый Чыж таксама гатовы скупіць акцыі ААТ «Менскі завод пеністых він». Згодна з індыкатыўнай заяўкай, пададзенай у «Беларускую валютна-фондавую біржу», агульны аб'ём інвестыцый «Трайпла» ў завод складзе Br25 млрд 846 млн або $ 3 млн 30 тыс.

Стадыён «Дынама»

Кампанія «Трайпл» Юрыя Чыжа гатовая інвеставаць у мадэрнізацыю менскага стадыёна «Дынама», паведаміла прэс-служба прэзідэнта па выніках нарады, прысвечанай пытанню рэканструкцыі стадыёна.

Да гэтага, летам 2012 года, Менгарвыканкам заняўся правядзеннем міжнароднага конкурсу па выбары арганізацыі для рэканструкцыі стадыёна «пад ключ» з прыцягненнем крэдыту замежнага банка. Па яго выніках пераможцам была вызначаная венгерская кампанія «Грабаплан М».

Аднак, як сцвярджаюць у прэс-службе прэзідэнта, пасля паўсталі істотныя нязгоды ў пытаннях крэдытавання і страхоўкі, і ўвесь працэс зноў затармазіўся.

БУДУЕ

Свінакомплекс у Налібоцкай пушчы

У гэтым годзе СТАА «Данпрод» пачало будаваць у Валожынскім раёне прадпрыемства па вытворчасці беконнай свініны. Жыхары вёсак Даўгулеўшчына, Канюшэўшчына і Пяршаі не сталі хаваць свайго абурэння і звярнуліся да мясцовых уладаў. Яны лічаць, што ад працы свінакомлекса пацерпіць экалогія рэгіёну.

У райвыканкаме такой рэакцыі грамадзян здзівіліся.

- Няма там ніякай праблемы. Гэта ж будуюць «трайплаўскія» - Чыж, - растлумачыў намеснік старшыні райвыканкама Іосіф Ляшкевіч. - Там закрыты комплекс, пытанняў няма. Па экалогіі ніякіх парушэнняў няма. Ад вёсак ён далёка, санітарныя нормы выкананы.

Жылы комплекс «У Траецкага»

У гэтым годзе завяршаецца будаўніцтва жылога комплексу «У Траецкага», які кампанія «Трайпл» будуе ў гістарычнай часткі Менска.

Забудоўшчык пазіцыянуе яго як комплекс «прэміум-класа». Жыхары сталіцы называюць яго адным з самых выродлівых будынкаў у Менску.

ВЫКАЗВАННІ ПРА ЧЫЖА І «ТРАЙПЛ»

Прадстаўнік венгерскай кампаніі «Грабаплан» у Беларусі Д'ердзь Міжак (у інтэрв'ю «Прессболу»):

«Мы зусім не супраць, каб прыватныя беларускія ці замежныя інвестары часткова фінансавалі рэканструкцыю стадыёна «Дынама»... Праўда, варта ўлічыць і тое, што сучасны стадыён - гэта перш за ўсё інжынернае збудаванне, а не звычайны аб'ект нерухомасці...

Узнікае пытанне: ці гатовая якая-небудзь беларуская кампанія ўзяць на сябе адказнасць за тое, што ўсе працы будуць выкананыя правільна і не прыйдзецца іх перарабляць за свае грошы, калі УЕФА раптам не сертыфікуе стадыён. Сам не каштаваў прадукцыю фірмы «Трайпл», але добра ведаю дзеянне бурбалак у газіроўцы: яны як з'яўляюцца, так і знікаюць».

Намеснік галоўнага рэдактара газеты «Прессбол» Сяргей Новікаў (у інтэрв'ю Goals.by):

«Я шмат чую пра «Трайпл», продаж і перапрацоўку нафтапрадуктаў і іншае ў выкананні фірмаў Чыжа... Уцягнуўшы галаву ў плечы, я праходжу каля Траецкага прадмесця, прыбітага гэтай высоткай, якую не зацемніць па выродлівасьці нават стадыён «Дынама», калі Чыж возьмецца яго рэканструяваць. У любым выпадку гэта будзе архітэктурная бяда Менска нумар два пасля гэтай высоткі... Карацей, калі я ўсё гэта ўспрымаю і атрымліваю падставы лічыць Чыжа паспяховым бізнэсмэнам, які кампетэнтны ў многіх сферах, у мяне не ўзнікае сумненняў. Але калі я гляджу, што адбываецца ў яго праекце пад назвай «Дынама-Менск», то думаю: «Божа мой, напэўна, ён такі ж неглыбокі ў астатніх сваіх бізнэсах». Хоць у астатнім у Чыжа ўсё лепш адбываецца. Юрый Аляксандравіч як футбольны менеджэр? Не ведаю, наколькі там шмат ведаў, але тое, што там побач і мудрасць не ляжала, я маю поўнае падставу заявіць».