Аляксандр Дабравольскі: ЗША могуць увесці новыя санкцыі

Для Беларусі няма вялікай розніцы, хто пераможа на выбарах у ЗША, лічыць палітык.

«Я думаю, што для дэмакратычнай Беларусі прынцыповай розніцы, хто пераможа на выбарах у ЗША, няма», - сказаў у інтэрв'ю сайту charter97.org сябра Палітрады Аб'яднанай грамадзянскай партыі (АГП) Аляксандр Дабравольскі.

Па словах палітыка, ключ да вырашэння праблемы ў адносінах з ЗША знаходзіцца ў Беларусі:

«Сітуацыя ў адносінах Беларусі і ЗША залежыць хутчэй ад нашай краіны, чым ад ЗША. Проста тых, хто парушае правілы прыстойнасці, не прымаюць у цывілізаваным грамадстве. Хто б ні стаў прэзідэнтам - Барак Абама або Міт Ромні - умовай для таго, каб Беларусь прызналі як нармальную дзяржаву, з'яўляецца прыстойныя паводзіны кіраўніцтва нашай краіны. Вядома, можна казаць, што Ромні можа заняць больш жорсткую пазіцыю, а можа і не, я не ўпэўнены. Але ўсё роўна ключ да вырашэння гэтай праблемы знаходзіцца ў Беларусі, а не ў ЗША».

Нават калі новы прэзідэнт ЗША не ўвядзе дадатковых санкцый у дачыненні да Беларусі, сітуацыя ў адносінах з гэтай краінай усё роўна будзе для нас вельмі нявыгаднай, адзначыў Аляксандр Дабравольскі:

«Не важна, хто будзе кіраўніком ЗША, адносіны паміж нашымі краінамі ўсё роўна будуць складанымі і напружанымі, і Беларусь ад гэтага толькі страціць. Ці ўвядуць ЗША новыя санкцыі - магчыма, калі будуць яшчэ нейкія рэзкія крокі з боку Беларусі. Калі іх не будзе, то ўсё роўна застанецца сітуацыя, якая вельмі не выгадная нашай краіне».

Шукаць ворагаў сярод самых уплывовых дзяржаў свету, як робяць улады Беларусі - неразумна, упэўнены палітык:

«Аднойчы я размаўляў з адным беларускім генералам, які казаў, што НАТА - наш страшны вораг. Я ў яго спытаў, а вы не баіцеся, што НАТА пра гэта даведаецца? Ён не змог нічога адказаць. Для Беларусі, як для невялікай краіны, вельмі недарэчна шукаць ворагаў. Разумныя людзі шукаюць сяброў, а шукаць ворагаў сярод самых уплывовых дзяржаў свету – неразумна ўтрая».

Нагадаем, у аўторак, 6 лістапада, стартавалі 57-е па ліку выбары прэзідэнта ЗША. За крэсла кіраўніка Злучаных Штатаў Амерыкі змагаюцца прадстаўнік дэмакратычнай партыі Барак Абама і рэспубліканец Міт Ромні.