Кангрэсмэн Сміт: Лукашэнка павінен паўстаць перад Гаагай

Беларускі кіраўнік вінаваты ў злачынствах супраць чалавечнасці.

Для таго каб змяніць сітуацыю з парушэннем правоў чалавека ў Беларусі, сусветныя лідэры павінны сістэматычна прыцягваць увагу да становішча спраў у рэспубліцы, а Аляксандр Лукашэнка павінен паўстаць перад Міжнародным крымінальным судом у Гаазе за злачынствы супраць чалавечнасці, лічыць старшыня Хельсінкскай камісіі ў Кангрэсе ЗША, перадае «Голас Амерыкі».

Выступаючы на мерапрыемстве, прысвечаным другой гадавіне жорсткага разгону 30-тысячнай дэманстрацыі ў цэнтры Менска 19 снежня 2010 года, амерыканскі кангрэсмен Крыстафер Сміт заявіў, што Злучаныя Штаты павінны ўзмацніць падтрымку грамадзянскай супольнасці ў Беларусі.

«У святле рэпрэсій абсалютна неабходна, каб урад ЗША не проста працягваў падтрымліваць грамадзянскую супольнасць і праваабаронцаў, але і павялічыў такую падтрымку. Мы таксама павінныя прыцягнуць да адказнасці самога Лукашэнку і яго паслугачоў за тое, як яны абыходзяцца з палітычнымі зняволенымі і людзьмі, якія змагаюцца за свабодную Беларусь», - заявіў кіраўнік Хельсінскай камісіі ў Кангрэсе ЗША.

З Беларусі для ўдзелу ў слуханнях прыехалі старшыня Беларускай асацыяцыі журналістаў Жанна Літвіна, прэзідэнт Беларускага дома правоў чалавека Таццяна Рэвяка і жонка палітвязня (у мінулым кіраўніка праваабарончага цэнтра «Вясна», а таксама віцэ-прэзідэнта Міжнароднай федэрацыі правоў чалавека) Алеся Бяляцкага - Наталля Пінчук.

Гаворачы аб сітуацыі ў Беларусі, Жанна Літвіна са шкадаваннем канстатавала, што ў краіне ўзмацняюцца кантроль над грамадствам і ціск на свабодныя СМІ.

«Сёння я вымушана казаць аб тым, што палітыка ў Беларусі нязменная, што супрацьстаянне носіць жорсткі характар, і што за апошнія 18 гадоў мы ўпершыню сутыкнуліся з сітуацыяй, калі ўнутраная палітыка накіраваная толькі на два прыярытэты. Па-першае, гэта ўзмацненне жорсткасці кантролю над грамадствам, а, па-другое, гэта ўзмацненне работы прапагандысцкай машыны», - заявіла Літвіна.

З такой ацэнкай сітуацыі пагадзілася і Наталля Пінчук, падкрэсліўшы, што міжнародная супольнасць не мае права займацца папушчальніцтвам, а як раз наадварот - яна павінна аб'яднацца ў сваім ціску на беларускія ўлады з тым, каб тыя не проста выпусцілі з турмаў, але і рэабілітавалі незаконна асуджаных .

«Адсутнасць якой-небудзь рэакцыі вядзе да папушчальніцтва і далейшага пагаршэння сітуацыі. У гэтым плане, вядома ж, вельмі важна скаардынаваць пазіцыі краін Еўразвяза і Злучаных Штатаў. Гэта магчыма зрабіць толькі сумеснымі намаганнямі», - заўважыла жонка праваабаронцы.

Тым часам выступоўцы адзначылі, што палітыкі ў Еўропе ўжо даўно сталі дэманстраваць «адкрытую стомленасць» кожны раз, калі размова заходзіць аб чарговых парушэннях правоў чалавека ў Беларусі.

«І гэта нядзіўна. Нядаўна я даведалася аб лічбе: з 1996 года Еўрапарламент прыняў 114 рэзалюцый па Беларусі», - заўважыла Літвіна.

Беларускія актывісты завастрылі ўвагу тых, хто сабраўся, на кантролі над Інтэрнэтам - апошняй апорай свабодных СМІ ў Беларусі, які ў апошні час стаў яшчэ больш жорсткім. Па словах выступоўцаў, кіраўніцтва рэспублікі прыняла шэраг заканадаўчых мер, якія абмяжоўваюць доступ да палітычна непажаданых сайтаў.

«Я прашу заўважыць, што сярод пяці сайтаў, якія знаходзяцца сёння ў «чорным спісе», знаходзіцца і партал праваабарончага цэнтра «Вясна». Аднак я нагадваю, што мы займаемся абаронай правоў чалавека; мы не займаемся ні парнаграфіяй, ні гандлем дзецьмі», - заўважыла кіраўнік Беларускага дома правоў чалавека Таццяна Рэвяка.

Актывісты нагадалі і аб іншай неадназначнай заканадаўчай ініцыятыве беларускіх уладаў - пераследзе арганізатараў так званых «маўклівых» акцый пратэсту, выкліканых рэзкім падзеннем курсу беларускага рубля ў мінулым годзе. За лета 2011 года, па словах беларусаў, праваахоўныя органы краіны затрымалі каля 3 тысяч нявінных чалавек.