Выніковы даклад па «выбарах»: Беларусь парушыла стандарты АБСЕ

Падчас беларускіх «парламенцкіх выбараў» не былі выкананыя шматлікія стандарты АБСЕ.

АБСЕ адзначае, што падчас «парламенцкіх выбараў» у Беларусі не былі выкананыя шматлікія стандарты гэтай арганізацыі, і прапануе краіне правесці рэформу выбарчага заканадаўства, піша «Інтэрфакс».

«Нягледзячы на некаторыя паляпшэнні ў выбарчым заканадаўстве, многія абавязацельствы ў рамках АБСЕ, у тым ліку права грамадзян на аб'яднанне, вылучэнне кандыдатур і свабодна выказваць сваё меркаванне, не былі выкананыя», гаворыцца ў канчатковым дакладзе БДІПЧ АБСЕ аб «парламенцкіх выбарах» у Беларусі 23 верасня 2012 года, які апублікаваны на афіцыйным сайце арганізацыі.

У дакладзе рэкамендуецца, каб «выбарчая рэформа ў Беларусі была ажыццёўлена задоўга да наступных «выбараў». «Беларускія ўлады павінныя сфармуляваць канкрэтныя і эфектыўныя меры для выканання рэкамендацый, вызначаных БДІПЧ/АБСЕ, каб выбарчы працэс стаў празрыстым», гаворыцца ў выніковым дакладзе.

У ім таксама адзначана, што «для павышэння празрыстасці і даверу да вынікаў «выбараў» працэдура падліку галасоў павінна быць яснай, адкрытай і празрыстай». «Такая працэдура падліку галасоў павінна строга выконвацца, а папярэднія і канчатковыя вынікі павінны быць апублікаваныя з поўнай разбіўкай галасавання па выбарчых участках», сказана ў выніковай справаздачы БДІПЧ АБСЕ.

У дакуменце таксама гаворыцца, што «выбарчая кампанія была ледзь бачная на большай частцы тэрыторыі краіны на працягу чатырох тыдняў» перад асноўным днём галасавання. У шэрагу выпадкаў «былі абмежаванні на правядзенне перадвыбарных мітынгаў, распаўсюджванне агітацыйных матэрыялаў, а таксама быў абмежаваны доступ да СМІ», адзначана ў дакладзе. Акрамя таго, там сказана, што «ў цэлым спакойная выбарчая кампанія была азмрочаная некалькімі паведамленнямі аб запалохванні кандыдатаў і актывістаў ад апазіцыі».

Нагадаем, што «парламенцкія выбары» прайшлі 23 верасня і не былі прызнаныя назіральнікамі АБСЕ свабоднымі і дэмакратычнымі.