Андрэя Гайдукова зноў перавялі ў Менск

Бацькі і адвакат нават не здагадваліся пра гэта, і збіралі «навагоднюю» перадачу ў Віцебскае СІЗА.

- Андрэя зноў перавялі ў Менск, - паведаміла ў чацвер раніцай «Салідарнасці» мама арыштаванага наваполацкага актывіста Вольга Гайдукова. - Адвакат пайшла на сустрэчу з сынам напярэдадні вечарам. І ў віцебскім ізалятары ёй паведамілі, што падабароннага перавезлі ў сталіцу яшчэ 22 снежня.

Жанчына вельмі засмучаная.

- Гэта ўвогуле жах, - перажывае яна. - У суботу я адвезла сястры ў Віцебск перадачу для сына. Справа ў тым, што ў святочныя дні пасылкі ў СІЗА прымаюць толькі 29 снежня і 5 студзеня. Мы падрыхтавалі яму «навагоднюю» перадачу, а цяпер нават не ведаем, куды яе адпраўляць і дзе ў Менску знаходзіцца Андрэй.

Пра тое, што з маладым чалавекам робіцца няладнае, мама здагадалася па адсутнасці свежых лістоў.

- З Віцебскага СІЗА лісты прыходзілі рэгулярна, хай і са спазненнем на тыдзень. І раптам перасталі прыходзіць наогул, - дзеліцца Вольга Гайдукова. - У апошніх лістах Андрэй піша: «Фальсіфікацыі па маёй справе даходзяць да абсурду». Так што мы ўжо не ведаем, што і думаць.

Кіраўнік наваполацкай незарэгістраванай моладзевай арганізацыі «Саюз маладых інтэлектуалаў» Яўген Канстанцінаў (у арганізацыі знаходзіцца і Гайдукоў) паведаміў, што на допыт у КДБ выклікалі яшчэ аднаго фігуранта «шпіёнскай» справы Іллю Багданава, актывіста «саюза» з Полацка. Апошні быў затрыманы разам з Андрэем Гайдуковым, але пазней адпушчаны на свабоду:

- Багданава выклікалі на допыт і чамусьці ў Віцебск. Ён павінен там з'явіцца 27 снежня ў якасці сведкі. Спадзяемся, што пасля допыту яго адпусцяць.

Па словах суразмоўцы, у адным з апошніх лістоў Гайдукоў паведаміў, што пад вартай мог апынуцца і сам Канстанцінаў.

- У нас за два тыдні да яго затрымання выйшла спрэчка, і мы практычна не размаўлялі, - адзначыў Яўген Канстанцінаў. - У лісце Андрэй напісаў, што калі б мы працягвалі зносіны, то ўсё магло б быць горш і за кратамі маглі б апынуцца мы абодва.

Нагадаем, што 23-гадовага аператара наваполацкага прадпрыемства «Нафтан» абвінавачваюць па крымінальным артыкуле «Здрада дзяржаве ў форме агентурнай дзейнасці».

Паводле афіцыйнай інфармацыі, хлопца затрымалі «падчас закладкі схованкі са звесткамі, якія цікавяць замежныя спецслужбы». Гэтае абвінавачванне многія лічаць бессэнсоўным. Грамадзянская кампанія «Еўрапейская Беларусь» выступіла з заявай, у якой паведамлялася аб тым, што актывіста затрымалі за распаўсюджванне газеты «Хартыя'97». Праваабаронцы пераслед Гайдукова звязваюць з яго апазіцыйнымі поглядамі і тлумачаць спробамі запалохаць моладзевых актывістаў.