Менская міліцыя «арыштавала» цацкі (Фота)

Выстаўленыя на плошчы Незалежнасці цацкі з плакатамі былі «затрыманыя» міліцыяй.

Актывісты моладзевага крыла грамадзянскай кампаніі «Гавары праўду» «Zмена» правялі 10 лютага на плошчы Незалежнасці ў Менску акцыю пад назвай «Цацко мітынгуэ!».

Як паведамляе сайт кампаніі «Гавары праўду», акцыя прайшла перад уваходам у Менскі гарадскі выканаўчы камітэт.

Цацкі былі выстаўленыя са словамі: «Алехандра, адпусці людзей!», «Мянты адарвалі мне вока», «Цацкі супраць бязмежжа».

Усе плюшавыя пратэстанты ў выніку былі затрыманыя нарадам міліцыі. Цалкам верагодна, што адміністрацыйныя справы супраць іх складацца ўсё ж не будуць: хоць прыкметы парушэння Закона аб масавых мерапрыемствах відавочныя.