Спрэчка Лукашэнкі і Мясніковіча аб сельскай гаспадарцы

Даўно заўважана, што ў нашай краіне шмат што дваіцца ў вачах нават у запісных цвярознікаў.

Да прыкладу, кіраўнікі краіны бачаць дзве сельскія гаспадаркі: адную - моцную і квітнеючую, другая знаходзіцца ў дрэнным стане.

З гэтай нагоды перыядычна абменьваюцца супрацьлеглымі меркаваннямі кіраўнік дзяржавы і прэм'ер-міністр. «Салідарнасць» прапануе вашай увазе своеасаблівую завочную дыскусію Аляксандра Лукашэнкі і Міхаіла Мясніковіча.

А. Лукашэнка: «Нашая палітыка, прабачце за нясціпласць, дальнабачная палітыка, дазволіла зрабіць вельмі магутны рывок у развіцці сельскай гаспадаркі краіны». (6 снежня 2010 года - на Усебеларускім народным сходзе)

М. Мясніковіч: «У працы Мінсельгасхарча сістэмнага падыходу мы не заўважаем. Эканоміка галіны знаходзіцца ў дрэнным стане, нават у вельмі дрэнным». (15 лютага 2011 года - на паседжанні Савета міністраў)

А. Лукашэнка: «Калі параўноўваць нас сёння з суседзямі і іншымі дзяржавамі, нават з некаторымі краінамі Еўразвяза, якія мяжуюць з намі, то, вядома, з пункту гледжання агракомплексу, і не толькі вытворчай сферы, але наогул жыцця людзей на вёсцы, Беларусь выглядае больш пераважна». (30 верасня 2011 года - на «Дажынках»)

М. Мясніковіч: «Эканоміка галіны не вытрымлівае ніякай крытыкі. Назапашана сістэмных абавязальніцтваў, па дадзеных на 1 студзеня, на 60 трлн. рублёў. Нават калі чаканая выручка ў 2012 годзе складзе каля 47-47,5 трлн., спатрэбіцца паўтара года працаваць, нічога пры гэтым не набываць і не выдаткоўваць... За год мы страцілі ў краіне 381 тыс. кароў, або 28,7% статку». (30 студзеня 2012 года - на нарадзе ва ўрадзе)

Чые аргументы больш пераканаўчыя, кожны вырашае сам. Асабіста мне ў сувязі з выказваннямі прэм'ер-міністра ўзгадваецца стары анекдот:

«Старшыня калгасу на агульным сходзе кажа:

- Не буду ад вас хаваць: становішча нашай гаспадаркі херовае. Зусім херовае.

Голас з месца:

- А вы не перабольшваеце?!»