Любоў Кавалёва звярнулася ў Канстытуцыйны суд

Таксама 1 лютага жанчына падала скаргу ў Генеральную пракуратуру Беларусі.

Як распавяла БелаПАН маці асуджанага да смяротнага пакарання за саўдзел у тэрарызме Уладзіслава Кавалёва, яна звярнулася ў Канстытуцыйны суд Беларусі.

1 лютага яна падала заяву ў Канстытуцыйны суд з тым, каб ён даў заключэнне аб прызнанні беларускага крымінальна-выканаўчага заканадаўства не адпаведным Канстытуцыі і міжнародным нормам. Гаворка ідзе пра тое, каб да разгляду Камітэтам ААН па правах чалавека звароту сям'і Кавалёвых прысуд суда не быў прыведзены ў выкананне. Беларускае заканадаўства гэтага не прадугледжвае.

Таксама 1 лютага Любоў Кавалёва падала скаргу ў Генеральную пракуратуру Беларусі. Гэты дакумент тычыцца знікнення ў СІЗА КДБ ужо двух даверанасцяў, падрыхтаваных сынам і ягоным адвакатам, з дапамогай якіх маці магла б звяртацца ў міжнародныя інстанцыі. Першая даверанасць была падрыхтаваная ў снежні 2011 года, другая - у студзені 2012 года.

Любоў Кавалёва таксама паведаміла, што сын і ягоны адвакат скончылі азнаямленне з пратаколамі судовых пасяджэнняў і маюць намер падрыхтаваць да іх заўвагі.

Апошні ліст ад Уладзіслава Любоў Кавалёва атрымала 30 студзеня. «Ліст аптымістычны», - сказала яна. Да гэтага лістоў не было больш за тры тыдні, але такую ​​затрымку сам асуджаны на смяротнае пакаранне патлумачыў працай па вывучэнні судовых пратаколаў.