Раман Якаўлеўскі: Пагрозы Лукашэнкі дададуць палітыкам ЕЗ адрэналіну

Рэакцыя на гэтыя фактычна пагрозы, хутчэй за ўсё, рушыць услед ужо ў бліжэйшыя дні, мяркуе палітычны аглядальнік Раман Якаўлеўскі.

Сёння, прымаючы даверчыя граматы амбасадараў дзевяці дзяржаў, прэзідэнт краіны Аляксандр Лукашэнка заявіў, што Беларусь пакуль трывае санкцыі, «якімі вы размахваеце перад нашым носам», але як толькі «вы пераступіце чырвоную лінію, мы адкажам вельмі жорстка».

Калі ў Еўропе нехта думае пра тое, што нас па-ранейшаму можна «схіліць» нейкімі санкцыямі, папрокамі, патрабаваннямі, то гэта дарога ў нікуды. Нават калі мы застанемся ў адзіноце, без Расеі, Кітая, без іншых нашых сяброў, то, паверце, мы тут да смерці будзем стаяць, як калісьці ў 1941-1945 гадах, абараняючы нашую незалежнасць і суверэнітэт», - цытуе кіраўніка ягоная прэс-служба.

Палітычны аглядальнік Раман Якаўлеўскі сказаў сайту «Товарищ.online», што няпроста каментаваць меркаванні, «сэнс якіх для дыпламатаў, якім яны былі адрасаваныя, у словах кшталту «нахіліць» і г.д. проста можа быць незразумелы».

На ягоную думку, «агульнавядома, якімі падзеямі была выкліканая цяперашняя сітуацыя ненармальных адносінаў Менска з Еўропай. Ну, можа быць, невядома хіба што новаму ізраільскаму амбасадару, які ўпершыню сёння ўбачыў у жывую кіраўніка Беларусі».

Што ж тычыцца «грозных папярэджанняў аб нейкай «чырвонай лініі», якую Захад павінен асцерагацца перайсці, то рэакцыя на гэтыя фактычна пагрозы, хутчэй за ўсё, рушыць услед ўжо ў бліжэйшыя дні».

Палітаглядальнік адзначыў, што «для еўрапаседжанцаў, якія 27 лютага павінныя зноў абмеркаваць «праблему Лукашэнкі», меркаванні, якія прагучалі, павінныя прыкметна дадаць адрэналіну».