Беларусь пастаўляе зброю на вайну ў Дарфуры

Пастаўкі ўзбраення з Кітая, Расеі і Беларусі прыводзяць да сур'ёзных парушэнняў правоў чалавека ў суданскім рэгіёне Дарфур.

Пра гэта гаворыцца ў справаздачы праваабарончай арганізацыі «Міжнародная амністыя».

Улічваючы сітуацыю, праваабаронцы заклікаюць ўрады тэрмінова узмацніць цяперашняе неэфектыўнае эмбарга ААН на пастаўкі зброі ў ахоплены грамадзянскім канфліктам Судан і падпісаць дзеючую дамову аб гандлі зброяй, паведамляе «Радыё Свабода».

У справаздачы «Судан: Няма канца канфлікту ў Дарфуры» «Міжнародная амністыя» спасылаецца на дадзеныя ААН і ілюструе, як Кітай, Расея і Беларусь «працягваюць пастаўляць зброю і боепрыпасы ў Судан, нягледзячы на ​​пераканаўчыя сведчанні, што гэтая зброя выкарыстоўваецца супраць грамадзянскіх жыхароў у Дарфуры».

У дакуменце, у прыватнасці, гаворыцца, што ў перыяд паміж 2008 і 2010 гадамі Судан атрымаў з Беларусі 15 самалётаў «Су-25». Паведамленні аб гэтых пастаўкі з'явіліся яшчэ ў кастрычніку 2010 года - агенцтва «Рэйтэр» спасылалася тады на канфідэнцыйную справаздачу камісіі экспэртаў ААН, якая сочыць за выкананнем эмбарга.

Самі па сабе пастаўкі зброі ў Судан не з'яўляюцца нелегальнымі, але пры гэтым, па ўмовах эмбарга ААН, патрабуюцца гарантыі ад суданскіх уладаў, што зброя не будзе выкарыстаная ў Дарфуры.

Канфлікт у Дарфуры разгарэўся ў 2003 годзе, калі паўстанцы, збольшага неарабскага паходжання, выступілі супраць урада. У выніку ваенных дзеянняў, паводле ацэнак ААН, загінулі больш за 300 тысяч чалавек.