Алесь Бяляцкі - лаўрэат прэміі нарвежскай асацыяцыі аўтараў

Беларускі палітвязень Алесь Бяляцкі, напэўна, не ведае, што ў гэтую нядзелю стаў лаўрэатам прэміі «Freedom of Expression», якую прысуджае Нарвежская асацыяцыя аўтараў.

Гэтую ўзнагароду атрымліваюць праваабаронцы, журналісты, літаратары, якія змагаюцца ў несвабодных краінах за свабоду выказвання меркаванняў, перадае «Радыё Свабода».

«Для майго мужа будзе сапраўдным сюрпрызам, калі я, калі вярнуся дадому, напішу яму аб гэтым», - сказала нарвежскім журналістам на цырымоніі ўзнагароджання жонка Бяляцкага Наталля Пінчук. Яна ўпэўненая, што прэмія ўзрадуе ейнага мужа.

Па словах прадстаўнікоў Association Freedom of Expression-Preis, узнагарода, прысуджаная Алесю Бяляцкаму, - гэта адзнака ягонай працы і тых высокіх мэтаў, якія ставяць перад сабой праваабаронцы «Вясны». Таксама гэта прызнанне дзейнасці беларускага палітвязня на міжнародным узроўні.

Бяляцкі знаходзіцца ў Бабруйскай калоніі з канца лютага.

Кіраўнік праваабарончага цэнтра «Вясна» Алесь Бяляцкі асуджаны на 4,5 гады турмы ў лістападзе мінулага года. Яго прызналі вінаватым у нявыплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоны рахунак, ішлі на праваабарончую дзейнасць.