Нацбанк пайшоў на канфлікт з Саўмінам

Нацбанк Беларусі не падтрымлівае прапанову ўрада па рэзкім зніжэнні стаўкі рэфінансавання.

«Калі з'яўляюцца фундаментальныя асновы па зніжэнні стаўкі рэфінансавання, то Нацыянальны банк прымае адпаведнае рашэнне», - заявіў намеснік старшыні праўлення Нацбанка Сяргей Дубкоў на прэс-канферэнцыі ў аўторак у Менску, каментуючы па просьбе агенцтва «Інтэрфакс-Захад» нядаўнюю ініцыятыву першага віцэ-прэм'ера ўрада Беларусі Уладзіміра Сямашкі, які прапанаваў Нацбанку ў II квартале рэзка знізіць стаўку рэфінансавання, каб пашырыць аб'ёмы крэдытавання.

«Банкі зацікаўленыя крэдытаваць. Але крэдытаваць - гэта не значыць даваць грошы, якія не будуць вернутыя. Банкі выкарыстоўваюць сродкі сваіх кліентаў і акцыянераў», - сказаў С.Дубкоў.

Ён падкрэсліў, што ўзровень стаўкі рэфінансавання адназначна будзе вызначацца узроўнем інфляцыі і параметрамі, якія прадугледжаныя асноўнымі напрамкамі грашова-крэдытнай палітыкі, зацверджанымі указам прэзідэнта. «Калі інфляцыя па выніках года складзе 19-22%, то стаўка рэфінансавання будзе зніжаная да 20-23%», - сказаў С.Дубкоў.

На думку намесніка кіраўніка НББ, ключавой падаплёкай кошту фінансавых рэсурсаў з'яўляецца рэнтабельнасць суб'ектаў гаспадарання і зніжэнне іх залежнасці ад спажывання энергіі і сыравіны. «А банкаўская сістэма - гэта ўсяго толькі адлюстраванне рэальнага сектара эканомікі», - канстатаваў С.Дубкоў. Ён нагадаў, што «адсоткавыя стаўкі - гэта адлюстраванне сітуацыі ў эканоміцы, і эканоміка павінная генераваць грошы, прадпрыемствы павінныя развівацца за кошт уласных рэсурсаў».

Пры гэтым С.Дубкоў падкрэсліў, што «Нацыянальны банк і ўрад праводзяць узгодненую грашова-крэдытную палітыку, а пэўныя тактычныя рознагалоссі - гэта прыкмета канструктыўнага ўзаемадзеяння».