Чаго баіцца камісія па памілаванні?

Сябар камісіі па памілаванні Мікалай Самасейка адмовіўся каментаваць звесткі аб галасаванні адносна прысуду Канавалаву і Кавалёву.

Нагадаем, 26 красавіка сайту charter97.org з уласных крыніц стала вядома аб тым, што рашэнне аб пакаранні Дзмітрыя Канавалава і Уладзіслава Кавалёва прымаў асабіста Аляксандр Лукашэнка. Камісія па памілаванні рэкамендавала яму захаваць ім жыццё.

Сябар камісіі па памілаванні пры Лукашэнку - кіраўнік камісіі «палаты прадстаўнікоў» па заканадаўстве і судова-прававых пытаннях Мікалай Самасейка не стаў каментаваць БелаПАН гэтыя звесткі.

«Без каментароў. Хто як галасаваў, якое рашэнне было прынятае - гэта тайна», - заявіў Самасейка.

Смяротны прысуд Дзмітрыю Канавалаву, прызнанаму вінаватым у тэрарызме, у прыватнасці ў выбуху ў менскім метро 11 красавіка 2011 года, і Уладзіславу Кавалёву, прызнанаму вінаватым у саўдзеле ў тэрарызме, Вярхоўны суд Беларусі вынес 30 лістападзе 2011 года. Кавалёў напісаў прашэнне Лукашэнку аб памілаванні, Канавалаў, паводле афіцыйнай інфармацыі, - не.

Пра тое, што Лукашэнка адмовіў у памілаванні, стала вядома 14 сакавіка. Гэта рашэнне было прынятае ў сувязі з небяспекай і надзвычай цяжкімі наступствамі для грамадства злачынстваў, здзейсненых асуджанымі на смяротнае пакаранне, паведаміў дзяржаўны тэлеканал.

17 сакавіка стала вядома, што абодва прысуды прыведзены ў выкананне. У афіцыйнай даведцы пра смерць Кавалёва датай смерці значыцца 15 сакавіка.

Нагадаем, скарга Кавалёва на прысуд была зарэгістраваная ў Камітэце ААН па правах чалавека. Камітэт прасіў беларускія ўлады не прыводзіць прысуд у выкананне, пакуль пытанне не будзе разгледжанае па сутнасці. Акрамя таго, наглядная скарга Кавалёва так і не была разгледжаная Вярхоўным судом Беларусі.