Праваабаронцы: Волчаку помсцяць за публікацыю на Хартыі'97

Абсерваторыя па абароне праваабаронцаў асудзіла арышт Алега Волчака.

«24 мая 2012 года, Алег Волчак, кіраўнік арганізацыі «Прававая дапамога насельніцтву», быў арыштаваны міліцыянтамі, якія абвінавацілі яго ў «лаянцы матам у грамадскім месцы». Пазней ён быў дастаўлены ў РУУС і прысуджаны да 9 сутак пазбаўлення волі судом Цэнтральнага раёна», - гаворыцца ў заяве арганізацыі, апублікаванай на ейным сайце (пераклад - charter97.org).

Абсерваторыя заклікае беларускія ўлады безумоўна вызваліць Волчака, бо ягонае затрыманне з'яўляецца адвольным і звязанае выключна з ажыццяўленнем ягоных законных правоў на свабоду выказвання меркавання. Праваабаронцы ўпэўненыя, што яго арышт звязаны з публікацыяй на сайце charter97.org ад 21 мая, у якой Волчак пісаў пра жорсткае збіццё міліцыянтамі мірных дэманстрантаў. Праваабаронца ахарактарызаваў такія паводзіны міліцыі як крымінал.

Абсерваторыя па абароне праваабаронцаў - сумесная праграма Міжнароднай федэрацыі правоў чалавека і Сусветнай арганізацыі супраць катаванняў.