Фільм беларускага рэжысёра трапіў у паўфінал Your Film Festival
4- 18.06.2012, 10:22
Your Film Festival - сусветны онлайн-кінафестываль, які праводзіць сайт YouTube.
Фільм «Перашкода» (The Obstacle), зняты па творы Данііла Хармса, удзельнічае ў фестывалі ад Украіны, дзе зараз жыве ягоны рэжысёр і сцэнарыст Максім Буйніцкі, паведамляе «Еўрарадыё».
У журы фестывалю ўваходзяць вядомы рэжысёр Рыдлі Скот і актор Майкл Фасбэндэр.
Максім Буйніцкі некалькі год таму быў адлічаны з Беларускай акадэміі мастацтваў і з'ехаў вучыцца і працаваць у Кіеў.
50 адабраных для фестывалю стужак з 12 чэрвеня па 13 ліпеня будуць спаборнічаць у онлайн-галасаванні за выхад у фінал Your Film Festival. Па выніках галасавання будуць абраныя не менш за 10 лаўрэатаў. Усе яны атрымаюць магчымасць удзелу ў Венецыянскім кінафестывалі. А пераможца атрымае грант на 500 тысяч даляраў на здымкі ўласнага фільма. Натуральна, пры дапамозе Рыдлі Скота, Майкла Фасбэндэра і іхняй каманды.
Паглядзець фільм і прагаласаваць за яго можна тут.
