Літва патрабуе публічнага абмеркавання беларускай АЭС

Першае такое публічнае абмеркаванне два гады таму правалілася, таму што беларускі бок не забяспечыў якасную ацэнку.

Літва сцвярджае, што Беларусь не развее яе сумневы ў бяспецы Астравецкай атамнай электрастанцыі, пакуль не адкажа на пастаўленыя пытанні і не арганізуе публічнае абмеркаванне справаздачы аб ацэнцы ўздзеяння АЭС на навакольнае асяроддзе ў Літве, піша ru.delfi.lt.

Дырэктар дэпартамента па прадухіленні забруджванняў пры Міністэрстве аховы навакольнага асяроддзя Віталіюс Аўгліс сказаў BNS, што Літве цяжка прыцягнуць Беларусь да супрацоўніцтва па пытаннях аховы навакольнага асяроддзя і ядзернай бяспекі. Але перш за ўсё Літва прапануе Беларусі аднавіць перапыненыя па віне гэтай краіны два гады таму кансультацыі па пагадненні аб супрацоўніцтве паміж міністэрствамі аховы навакольнага асяроддзя абедзвюх краін.

Аўгліс сцвярджае, што такое пагадненне паміж міністэрствамі неабходнае дзеля падрыхтоўкі любых працэдур ацэнкі ўздзеяння на навакольнае асяроддзе, не толькі тых, якія датычацца ядзерных праектаў, для прадстаўлення і апублікавання справаздач аб ацэнцы ўздзеяння на навакольнае асяроддзе.

Літва абскардзіла Беларусь у сувязі з неналежным прымяненнем Канвенцыі аб ацэнцы ўздзеяння на навакольнае асяроддзе ў трансмежавым кантэксце (Канвенцыя ЭСПА) пры ажыццяўленні праекта Астравецкай АЭС. Камітэт па ажыццяўленні канвенцыі павінен прадставіць папярэднія высновы ў верасні гэтага года.

«Камітэт па ажыццяўленні ЭСПА сфармуляваў дадатковыя пытанні Беларусі аб праекце электрастанцыі - гэта добры знак», - сказаў Аўгліс.

Паводле яго, пакуль Беларусь не адкажа на пытанні Літвы і не арганізуе публічнае абмеркаванне справаздачы аб ацэнцы ўздзеяння АЭС на навакольнае асяроддзе ў Літве, яна не развее сумневы Літвы. Першае такое публічнае абмеркаванне два гады таму правалілася, таму што беларускі бок не забяспечыў якасную ацэнку.

Па словах Аўгліса, Беларусь да гэтага часу не даслала адказы, хоць Літва прадставіла ёй свой праект пагаднення два гады таму. Таму, як сцвярджае Аўгліс, невядома, ці адбудзецца ў канцы чэрвеня сустрэча, прысвечаная двухбаковаму пагадненню паміж міністэрствамі.

«Зараз мы просім у Беларусі зваротнай сувязі, а яе пакуль няма - інакш невядома, пра што мы будзем дыскутаваць, таму што пакуль мы нічога ад іх не атрымалі. Яны за два гады не змаглі ні даслаць свае заўвагі, ні сфармуляваць, чаго яны хочуць - не ведаю, з чым яны гэта звязваюць. Таму мы не ўпэўненыя, што гэтая сустрэча адбудзецца», - сказаў Аўгліс.

Беларускія чыноўнікі сцвярджаюць, што маюць намер прыехаць у Вільню дзеля кансультацый з Міністэрствам аховы навакольнага асяроддзя. Начальнік дзяржаўнай экалагічнай экспертызы Міністэрства прыродных рэсурсаў Беларусі Аляксандр Андрэеў на гэтым тыдні сказаў BNS, што, калі будуць вылучаныя грошы на паездку, беларускія службовыя асобы прыедуць у Вільню, магчыма, 27-29 чэрвеня.

Літва не ўхваляе планы Менска пабудаваць атамную электрастанцыю ў Астравецкім раёне, побач з мяжой Літвы, на адлегласці 50 кіламетраў ад Вільні. Літва не раз сцвярджала, што праект Беларускай АЭС выклікае сумневы ў сувязі з уздзеяннем на навакольнае асяроддзе і не адпавядае патрабаванням міжнародных канвенцый.