За зносіны з Бяляцкім зняволеных выклікаюць на «гутаркі»

У бабруйскай выпраўленчай калоніі № 2 зняволеным забараняюць мець зносіны з праваабаронцам Алесем Бяляцкім.

Пра гэта БелаПАН паведаміла намесніца дырэктара інфармацыйна-асветніцкай установы «Платформа» Алена Красоўская-Каспяровіч.

Паводле яе, нядаўна «Платформа» атрымала ліст ад былога зняволенага бабруйскай калоніі, які вызваліўся «літаральна на днях». «Ён паведаміў пра ціск на праваабаронца Алеся Бяляцкага, які знаходзіцца ў калоніі. Усе зняволеныя, з якімі мае зносіны Бяляцкі, выклікаюцца ў штаб калоніі для прафілактычных гутарак. Адміністрацыя калоніі ўвяла фактычную забарона на зносіны з праваабаронцам і папярэджвае асуджаных пра «наступствы» парушэння забароны», - паведаміла Красоўская-Каспяровіч.

«З калоніі паведамлялі, што Бяляцкі ставіцца да гэтага з разуменнем і сам стараецца не падстаўляць людзей, не размаўляць лішні раз з тымі, каму гэта можа пашкодзіць», - сказала Красоўская-Каспяровіч.

«У сваім лісце былы асуджаны распавёў, што права выпісваць «Народную волю» засталося толькі ў тых, хто, на думку кіраўніцтва калоніі, цвёрда стаў на шлях выпраўлення. Усіх астатніх выклікаюць прадстаўнікі адміністрацыі і праводзяць з імі «прафілактычную гутарку», кажучы, што газета «занадта шмат сабе дазваляе», - заявіла намесніца старшыні «Платформы».

Падобныя дзеянні адміністрацыі калоніі груба супярэчаць артыкулу 89 Крымінальна-выканаўчага кодэкса, лічыць Красоўская-Каспяровіч. Асуджаным да пазбаўлення волі дазваляецца атрымліваць у пасылках, перадачах, бандэролях і дробных пакетах пісьмовыя прыналежнасці, набываць праз гандлёвую сетку літаратуру, а таксама без абмежавання падпісвацца на газеты і часопісы за кошт уласных сродкаў звыш сум, усталяваных дзеля набыцця прадуктаў харчавання і прадметаў першай неабходнасці, адзначыла яна.