Козік: Хто заклікаў да санкцый - у «парламент» не пусцім

Федэрацыя прафсаюзаў Беларусі не можа застацца ў баку ад такой грамадска значнай падзеі, як «парламенцкія выбары», заявіў кіраўнік афіцыйнага прафцэнтра Леанід Козік.

«Выбары - гэта найважнейшая кампанія, якая мае непасрэдны ўплыў на далейшае развіццё беларускага грамадства, паколькі абраныя дэпутаты на працягу наступных чатырох гадоў праз прыманыя законы шмат у чым будуць вызначаць курс краіны. Федэрацыя прафсаюзаў Беларусі, як самая масавая грамадская арганізацыя, не можа заставацца ў баку ад такой значнай падзеі», - цытуе Козіка прэс-служба ФПБ.

Пры гэтым ён падкрэсліў: «Тым, хто адкрыта выступаў супраць Федэрацыі прафсаюзаў Беларусі, а значыць і супраць працоўных, заклікаў да байкоту беларускіх тавараў на еўрапейскіх рынках, патрабаваў увядзення санкцый у дачыненні да нашай краіны, не месца ў парламенце. ФПБ прыкладзе ўсе намаганні, каб не дапусціць такіх людзей да заканатворчай дзейнасці».

Прэс-служба ФПБ нагадвае, што «парламенцкая выбарчая кампанія» стартавала 18 чэрвеня. У цяперашні час праходзіць вылучэнне кандыдатаў у сябры акруговых выбарчых камісій.

«Актыўна на гэтым этапе ўдзельнічаюць і сяброўскія арганізацыі нацыянальнага прафцэнтра. Чакаецца, што ад Федэрацыі прафсаюзаў у склад 110 акруговых камісій будзе вылучана не менш за 300 чалавек. Таксама актыўна ФПБ плануе ўдзельнічаць ва ўсіх этапах кампаніі па выбарах у «палату прадстаўнікоў», у тым ліку і на этапе вылучэння кандыдатаў у дэпутаты. Федэрацыя прафсаюзаў Беларусі адкрыта заявіла аб тым, што падтрымае толькі тых кандыдатаў, мэты, задачы і рэальная дзейнасць якіх не супярэчаць палітыцы пабудовы дзяржавы для людзей, дзяржавы з сацыяльна арыентаванай эканомікай, якая праводзіцца ў краіне», - гаворыцца ў паведамленні.