Дыктатар просіць прызнаць яго «выбары»

Лукашэнка зноў расказвае казкі аб «адкрытых і свабодных выбарах» і разлічвае на іх прызнанне.

«Выбары» мы хочам правесці адкрыта, транспарэнтна, годна.

А галоўнае, каб «выбары» былі легітымныя. А гэта залежыць ад таго, наколькі свабодным будзе волевыяўленне», - заявіў Аляксандр Лукашэнка ў панядзелак у Менску, сустракаючыся са старшынёй Выканаўчага камітэта СНД Сяргеем Лебедзевым, перадае «Інтэрфакс».

Як адзначыў Лукашэнка, на ўзроўні кіраўніцтва краіны праведзены шэраг нарад па выбарчай кампаніі, «усё атрымалі ўказанні, органы, якія будуць праводзіць «выбары», сфарміраваны». «Пачалося вылучэнне кандыдатаў, мы гэта зробім вельмі годна і запрашаем вашу місію для назірання», - сказаў Лукашэнка.

Ён заявіў, што Беларусь заўсёды з задавальненнем запрашае місію назіральнікаў ад СНД. «Мы хочам, каб вы яе ўзначалілі, таму што давер да вас у Беларусі высокі, прытым ва ўсіх інстытутаў улады», - адзначыў Лукашэнка, звяртаючыся да Лебедзева. «Мы тут нічога не хаваем, вы гэта ведаеце», - сказаў ён.