«Рэпарцёры без межаў» патрабуюць вызваліць Антона Сурапіна

Міжнародная арганізацыя настойвае на неадкладным вызваленні арыштаванага журналіста.

Антон Сурапін, рэдактар інфармацыйнага вэб-сайта быў затрыманы пасля ператрусу, праведзенага ў яго дома 13 ліпеня супрацоўнікамі КДБ Беларусі на падставе высвятлення яго дачынення да акцыі шведскага рэкламнага агенцтва ў падтрымку свабоды слова ў Беларусі, гаворыцца ў заяве арганізацыі (пераклад - charter97.org) .

Як стала вядома, Антон Сурапін абвінавачаны ў дапамозе шведскім пілотам у перасячэнні мяжы. Яму пагражае ад трох да пяці гадоў турэмнага зняволення.

Акцыя шведскага рэкламнага агенцтва не павінна выкарыстоўвацца ўладамі ў якасці падставы для пераследу журналістаў, блогераў і прадстаўнікоў грамадскасці, гаворыцца ў заяве арганізацыі. Пілот шведскага самалёта пацвердзіў, што ў яго не было ніякіх кантактаў з Антонам Сурапіным, у падрыхтоўке акцыі грамадзяне Беларусі не ўдзельнічалі.

Лукашэнка, які знаходзіцца ў спісе «ворагаў прэсы», працягвае весці краіну да палітычнай ізаляцыі і эканамічнай ізаляцыі. Пры гэтым, ён падвяргае пераследу тых, хто выкарыстоўвае Інтэрнэт для распаўсюджвання інфармацыі, нагадваюць «Рэпарцёры без межаў».

Як ужо паведамляў сайт charter97.org, раніцай 4 ліпеня шведскі лёгкі самалёт скінуў над Беларуссю плюшавых мядзведзяў з лозунгамі ў падтрымку дэмакратыі. У сваю чаргу Мінабароны Беларусі заявіла, што парушэнняў паветранай прасторы краіны не было, а выкладзеныя ў інтэрнэце ролікі, якія даказваюць зваротнае, назвала фальсіфікацыяй.

Антон Сурапін быў адным з першых, хто апублікаваў фота плюшавых мядзведзяў у інтэрнэце.