Studio Total пачала прадаваць сумкі з «мядзведжым дэсантам»

Замовіць сабе такую сумку ад шведскага рэкламнага агенцтва можна за 18 даляраў.

Пажывіцца сумкай можна на сайце cafepress.com. Дызайн распрацаваны Studio Total, той самай, якая сцвярджае, што правяла акцыю з бамбаваннем Беларусі цацачнымі медзведзянятамі, перадае «Еўрарадыё».

Нагадаем, што лёгкі шведскі самалёт маркі Jodel раніцай 4 ліпеня перасёк літоўска-беларускую мяжу і даляцеў да Менска, скінуўшы там некалькі сотняў цацачных медзведзянятаў, да якіх былі прымацаваныя запіскі з патрабаваннямі свабоды слова. На зваротным шляху самалёт правёў такую ж акцыю над Івянцом. У той жа дзень некаторыя шведскія СМІ апублікавалі фота і відэа палёту.

Афіцыйны Менск да гэтага часу абвяргае факт парушэння мяжы, аднак КДБ узяў пад варту фатографа Антона Сурапіна і рыэлтара Сяргея Башарымава. Абодва праходзяць па справе аб парушэнні дзяржаўнай мяжы групай асоб. КДБ ход расследавання ніяк не каментуе.