Менгарвыканкам забараніў адзначаць Дзень незалежнасці

КХП-БНФ адмовілі ў правядзенні святочнага мітынгу 27 ліпеня.

27 ліпеня 1990 года Вярхоўны Савет БССР прыняў Дэкларацыю аб дзяржаўным суверэнітэце. Гэты дзень быў абвешчаны Днём незалежнасці Беларусі. Цяперашнія ўлады адмянілі свята пасля рэферэндуму 1996 года і прызначылі Дзень незалежнасці на 3 ліпеня - дзень вызвалення Менска ад гітлераўцаў, перадае «Радыё Свабода».

Дэмакратычная грамадскасць па-ранейшаму прызнае Днём незалежнасці Рэспублікі Беларусь 27 ліпеня і на працягу многіх гадоў адзначае яго вулічнымі акцыямі, мітынгамі, творчымі вечарамі і іншымі мерапрыемствамі. У гэтым годзе дзень дзяржаўнага суверэнітэту Беларусі палітычныя партыі і рухі па розных прычынах адзначаць не плануюць.

Адна з прычын - забарона менскіх улад, распавёў Юрый Беленькі, адзін з лідэраў КХП БНФ.

Гарвыканкам адмовіў нам у правядзенні мітынгу ў парку імя Янкі Купалы. Маўляў, у гэты дзень там запланавана прыбіранне тэрыторыі, санітарная апрацоўка помніка. Гарвыканкам і раней нам адмаўляў з падобнай фармулёўкай, але толькі ў Кіеўскім скверы. Гэта сведчыць аб тым, што адмову далі людзі, якія дэманстратыўна і цынічна не прымаюць нас, беларусаў. Бо 27 ліпеня - гэта дзень, калі была прынятая Дэкларацыя аб незалежнасці нашай краіны. Ён быў абвешчаны святочным днём - Днём незалежнасці. Чужая ўлада адмяніла яго. Тым не менш гэты дзень вельмі важны ў нашай гісторыі, і беларусам, якія адчуваюць сябе беларусамі, варта было б гэты дзень адзначыць. Гэта можа быць званок сябру. Гэта можа быць творчая ўрачыстасць ці нешта іншае. У любым выпадку - гэта элемент супрацьстаяння гэтай уладзе, якая гэтак цынічна здзекуецца над нашай гістарычнай памяццю.

Старшыня Партыі БНФ Аляксей Янукевіч распавёў аб планах сваёй партыі на 27 ліпеня.

- У свой час мы праводзілі розныя вулічныя мерапрыемствы. У гэтым годзе вулічных масавых акцый мы не плануем. Мы рэкамендавалі ўсім тым нашым кандыдатам, чыі ініцыятыўныя групы зарэгістраваныя, каб яны ў гэты дзень збіралі подпісы на вуліцах пад бел-чырвона-белымі сцягамі. І гэта павінна быць прымеркавана менавіта да гадавіны прыняцця Дэкларацыі аб дзяржаўным суверэнітэце. А таксама каб у рэгіянальных структурах былі праведзены ўрачыстыя вечары. У нас у Менску таксама адбудзецца ўрачысты сход. Фактычна мы вырашылі, што фармат пікетаў пад бел-чырвона-белымі сцягамі на сённяшні момант - гэта аптымальны фармат.