Беларусь і Венесуэла будуць разам асвойваць космас

Беларусь будзе ажыццяўляць у Венесуэле будаванне касмічнай базы для запуску штучных спадарожнікаў.

Пра гэта заявіў пасол Венесуэлы ў Беларусі Амерыка Дыяс Нуньес.

«Беларусь будзе браць удзел у будаванні касмічнай базы ў штаце Арагуа ў Венесуэле. Будаванне гэтай базы запланавана не для запуску ядзерных ракет, а для запуску навукова-даследніцкіх спадарожнікаў», - сказаў пасол у сераду на прэс-канферэнцыі ў Мінску, перадае «Інтэрфакс».

Ён адзначыў, што гэта адзін з цэлага шэрага праектаў, які будзе рэалізаваны ў трохбаковым фармаце: Беларусь-Венесуэла-Кітай.

«У наш час спадарожнікі вырабляюцца ў Кітаі, але ўжо дасягнута дамоўленасць, што яны будуць збірацца на тэрыторыі Венесуэлы», - сказаў дыпламат.

А.Д.Нуньес таксама нагадаў, што Беларусь у партнёрстве з Кітаем і Венесуэлай будзе весці будаванне ЦЭЦ у штаце Барінас. Кошт гэтага праекта складае $900 млн. Пры гэтым прадугледжваецца, што фінансаванне праекта будзе ажыццяўляць кітайскі бок. Беларусь жа паставіць адпаведныя тэхналогіі.

«ЦЭЦ будзе пабудавана за 3 гады, з 2012 па 2015 год, у прамысловай зоне Санта-Інэс у штаце Барінас», - сказаў дыпламат.