Аляксандр Малчанаў чакае этапу

Адвакат не змагла 5 ліпеня сустрэцца з палітвязнем Аляксандрам Малчанавым - з Мінскага абласнога суда не прыйшлі дакументы ў ШЫЗА Жодзіна.

Пра гэта паведаміла дэмакратычная актывістка Ганна Шапуцька, піша «Беларускі партызан».

«Сёння мы чакалі сустрэчы адваката з Аляксандрам, але, на вялікі жаль, адвакат не ўбачыла Аляксандра, таму што, як ёй растлумачыў начальнік ШЫЗА Жодзіна, не прыйшлі дакументы з абласнога суда, і таму адвакат не мае права на сустрэчу з падабаронным. Але сувязь ёсць, Саша піша лісты, вельмі караценькія, сціплыя, сумленныя. Перажывае за бацьку і чакае этапу!» - адзначыла Ганна Шапуцька.

Беларускага палітвязня Аляксандра Малчанава і яго бездапаможнага бацьку ўсяляк падтрымліваюць неабыякавыя беларусы.

«Амаль штодня прыходзяць ахвяраванні з розных куткоў нашай краіны. Хто ахвяруе 30 тысяч, хто - 100, а хто 400 - хто колькі можа. Вялікі дзякуй і нізкі паклон ад бацькі Аляксандра і самога Аляксандра. Вялікі дзякуй грамадскаму актывісту з Барысава Міхаілу Васільеву за дапамогу з перадачамі, вялікі дзякуй суседцы Малчанавых спадарыні Генрыэце і неабыякавай жыхарцы Барысава спадарыні Ганне за тую самаадданасць і адказнасць, з якой яны дапамагаюць сям'і Малчанава. Зброя супраць гвалту і беззаконнасці, якія чыніць дзяржава - наша народная салідарнасць!» - адзначае Ганна Шапуцька.

9 красавіка суддзя Жодзінскага гарадскога суда Грынкевіч вынес прысуд у дачыненні былога палітвязня Аляксандра Малчанава і Арцёма Ігнацікава.

За крадзеж металалому з тэрыторыі жодзінскага кавальскага завода цяжкіх штамповак на суму 450 тысяч рублёў Малчанаву прысудзілі 1,5 гады калоніі строгага рэжыму, Ігнацікаву - 1,5 гады калоніі строгага рэжыму з адкладам пакарання на адзін год. Такім чынам, суддзя Грынкевіч падтрымаў патрабаванні старэйшага памочніка пракурора горада Жодзіна Цынцэвіцкай. Адвакат Малчанава мае намер на працягу адведзеных законам дзесяці дзён падаць апеляцыю ў Мінскі абласны суд.

Малчанаў і Ігнацікаў былі затрыманы ў студзені гэтага года жодзінскімі міліцыянерамі з доказамі злачынства: з тэрыторыі закінутага цэха кавальскага завода яны вывезлі металалом на суму 450 тысяч рублёў. Да суда Аляксандр Малчанаў знаходзіўся ў Жодзінскім ШЫЗА, Ігнацікаў - пад падпіскай аб невыязде.

Акрамя таго, супраць Малчанава была адноўлена крымінальная справа па артыкуле 370 Крымінальнага кодэкса Рэспублікі Беларусь «Здзек з дзяржаўных сімвалаў». Паводле словаў намесніка кіраўніка «Вясны» Валянціна Сцефановіча, «у частке дзяржаўнай сімволікі можна казаць, што ёсць палітычны матыў у дзеяннях Малчанава, калі ён сапраўды гэта рабіў (віны сваёй ён не прызнае), або палітычны матыў з боку дзяржавы».

Праваабаронцы былі на кожным з чатырох пасяджэнняў Жодзінскага суда па справе Малчанава і адсочвалі, «каб не было прадузятага дачынення, каб у дачыненні да яго выконваліся ўсе працэсуальныя гарантыі, каб суд не насіў абвінаваўчага ўхілу з-за таго, што ён палітычна актыўны чалавек».