Deutsche Bank: Падзенне коштаў на нафту пагражае беларускай эканоміке

Кіраўніцтва банка папярэджвае аб пагрозах для Беларусі ў сувязі з сусветным падзеннем коштаў на нафту.

«Калі кошты на нафту будуць падаць, гэта будзе дрэнна не толькі для Расеі і краін СНД, але і для Беларусі, якая залежыць ад паставак сыравіны з Расеі, сістэма экспартных пошлін якой цалкам прывязаная да расейскай», - заявіла дырэктар рэгіянальнага ўпраўлення па Цэнтральнай і Усходняй Еўропе Deutsche Bank Дагмар Ліндэр на пасяджэнні Рэспубліканскага клуба дырэктараў у пятніцу ў Менску, перадае «Інтэрфакс».

Ліндэр канстатавала, што ў 2011 годзе ў Беларусі была ажыццеўлена значная дэвальвацыя нацыянальнай валюты. «Я не буду выказваць меркаванне з гэтай нагоды, але сітуацыя і зараз застаецца вельмі няўстойлівай, да гэтага ўлады краіны павінны быць падрыхтаваны», - сказала яна.

Ліндэр дадала, што на сённяшні дзень у беларускай эканоміке сітуацыя ў цэлым дастаткова складаная, захоўваюцца высокія рызыкі як для бізнэсу, так і для банкаўскага сектара.

Што датычыцца першай хвалі глабальнага фінансава-эканамічнага крызісу ў 2009 годзе, прадстаўнік Deutsche Bank заўважыла, што ён практычна не аказаў ўплыву не Беларусь. «Затое зараз аб'ём крэдытавання банкамі эканомікі значна паменшыўся», - заўважыла Ліндэр.

Яна патлумачыла, што гэта адпавядае агульнаеўрапейскім тэндэнцыям і можа разглядацца як адкладзеныя наступствы першай хвалі крызісу. У той жа час, прадстаўнік Deutsche Bank не выключыла і іншых фактараў, якія ўплываюць на скарачэнне падтрымкі банкамі рэальнага сектара.

Таксама Ліндэр бачыць высокія рызыкі ў прадастаўленні крэдытаў беларускім інвестарам для рэалізацыі інвестпраектаў.

«Я не гатовая ў цэлым ацэньваць эканоміку Беларусі, але зразумела, што краіна, якая абесцэніла сваю валюту амаль на 300% і якая мае дастаткова высокі ўзровень інфляцыі, з'яўляецца даволі рызыкоўным рынкам», - заявіла Ліндэр.

Яна дадала, што сёння еўрапейскія банкі і без таго працуюць ва ўмовах высокай рызыкі ў Еўразоне, гэтая сітуацыя, а таксама сённяшні стан эканомікі Беларусі, уплываюць на працягласць і ўмовы пазыкі для беларускіх крэдытаатрымальнікаў.

У сувязі з гэтым Ліндэр рэкамендавала беларускім кампаніям, якія маюць ва ўстаўных фондах замежны і, у прыватнасці, нямецкі капітал, «дамаўляцца са сваімі нямецкімі партнёрамі, каб яны дамагаліся атрымання страхавога пакрыцця экспартных рызык ад Фонду Hermes». Такім чынам, калі будзе рэалізавана гэтая схема, прадастаўленне крэдытаў будзе весціся, фактычна, пад гарантыі нямецкага ўрада.

Ліндэр паведаміла, што на сённяшні дзень Deutsche Bank ажыццяўляе крэдытаванне па двух заяўках з Беларусі. «Яны будуць дзейнічаць да 2015 года, стаўка па гэтых заяўках складае 9%», - дадала Дырэктар рэгіянальнага кіравання.