АБСЕ заклікала да санкцый супраць «cпіса Магніцкага»

Парламенцкая асамблея АБСЕ ўхваліла праект рэзалюцыі, якая прадугледжвае санкцыі ў дачыненні да шэрагу расейскіх чыноўнікаў.

Рэзалюцыя заклікае да прыняцця мер супраць тых службовых асоб, чыі імёны звязваюць з гібеллю ў маскоўскім СІЗА юрыста Сяргея Магніцкага, паведамляе ВВС.

За прыняцце рэзалюцыі пад назвай «Законнасць ў Расеі: справа Сяргея Магніцкага» заклікаў прагаласаваць асноўны яе аўтар, былы старшыня Парламенцкай асамблеі АБСЕ Жоао Саарэш, а таксама прадстаўнікі Грузіі, Латвіі, Францыі, Нарвегіі, Нідэрландаў, Канады. Джон Маккейн, які прадстаўляе ЗША, таксама падтрымаў рэзалюцыю.

Расейскія парламентарыі галасавалі супраць прыняцця рэзалюцыі.

Прадстаўнік Расеі назваў дакумент «паспешным і змяшчаючым неаб`ектыўныя дадзеныя», а таксама заявіў, што аўтары дакумента «ўзялі на сябе паўнамоцтвы суддзі» і заклікаў перапісаць тэкст рэзалюцыі.

У рэзалюцыі, якая носіць рэкамендацыйны характар, гаворыцца, што АБСЕ заклікае дзяржавы-ўдзельніцы ўводзіць санкцыі ў дачыненні да адказных за грубыя парушэнні правоў чалавека асоб.

Кансультант інвестфонда Hermitage Capital Сяргей Магніцкі памёр у следчым ізалятары ў Маскве ў лістападзе 2009 года. Праваабаронцы і калегі юрыста ўпэўнены ў тым, што Магніцкі памёр з-за ўмоў утрымання і адмовы ў медыцынскай дапамоге.

Расейскія ўлады абвінавачвалі Магніцкага ва ўхіленні ад выплаты падаткаў, аднак калегі памерлага ў СІЗА юрыста настойваюць, што крымінальная справа ў дачыненні да Магніцкага была сфабрыкавана з мэтай прымусіць юрыста адмовіцца ад паказанняў супраць шэрагу сілавікоў, якія з дапамогай схемы – меркавана выкрытай Магніцкім - выкралі з казны 5,4 млрд рублёў (230 млн даляраў).

Згуба Магніцкага выклікала шырокі грамадскі рэзананс не толькі ў Расеі, але і на Захадзе.

Амерыканскі варыянт

У канцы чэрвеня свой варыянт «спісу Магніцкага» аднагалосна ўхваліў камітэт па міжнародных адносінах сената ЗША.

Законапраект аб санкцыях у дачыненні да расейскіх чыноўнікаў, адказных, на думку некаторых амерыканскіх сенатараў, за парушэнні правоў чалавека, быў унесены на разгляд Сената ў 2010 годзе групай сенатараў на чале з Бенджамінам Кардзінам.

Ён прадугледжвае, у прыватнасці, візавыя санкцыі і замарожванне банкаўскіх рахункаў у ЗША ў дачыненні да 60 расейскіх чыноўнікаў, як мяркуецца, якія  маюць адносіны да смерці Магніцкага.

Як паведамляецца, пад дзеянне «закона Магніцкага» могуць таксама трапіць расейскія функцыянеры, якія звязаны з забойствамі, катаваннямі і іншымі парушэннямі правоў чалавека ў дачыненні да тых, хто спрабаваў раскрыць незаконную дзейнасць чыноўнікаў.

Поўны спіс чыноўнікаў, складзены сенатарам Кардзінам, не можа быць абвешчаны публічна, таму што заканадаўства ЗША прадугледжвае невыдаванне інфармацыі аб візавых дадзеных.

Як паведамляў раней сайт charter97.org, Сенат ЗША мае намер зрабіць «закон Магніцкага» універсальным.

Законапраект можа ўступіць у сілу пасля зацвярджэння яго абедзвюма палатамі і прэзідэнтам ЗША.

Раней прадстаўнік дзярждэпартамента Вікторыя Нуланд заявіла, што адміністрацыя прэзідэнта ЗША Барака Абамы падтрымлівае прыняцце «закона Магніцкага», які знаходзіцца на разглядзе ў кангрэсе.