Алесь Бяляцкі атрымаў прэмію Фонду Генрыха Бёля

Нямецкі фонд ўзнагародзіў беларускага праваабаронца прэміяй Петры Кэлі.

Алесь Бяляцкі ўдастоены ўзнагароды за адстойванне правоў чалавека ў аўтарытарнай Беларусі, паведамляе Deutsche Welle.

Нямецкі фонд імя Генрыха Бёля прысудзіў прэмію Петры Кэлі беларускаму праваабаронцу Алесю Бяляцкаму. Як гаворыцца ў прэс-рэлізе Фонду, апублікаваным у аўторак, 26 чэрвеня, грамадскі дзеяч удастоены ўзнагароды за шматгадовы ўклад у барацьбу за захаванне правоў чалавека ў аўтарытарнай Беларусі. Прэмія з'яўляецца выразам салідарнасці з Бяляцкім і іншымі палітычнымі зняволенымі ў Беларусі і пацвярджэннем патрабавання аб іх неадкладным вызваленні, адзначаецца ў рашэнні журы.

Агенцтва epd звяртае ўвагу на тое, што лаўрэат адмовіўся ад грашовай узнагароды ў памеры 10 тысяч еўра, гэтую суму Фонд Генрыха Бёля мае намер выкарыстоўваць для ўмацавання праваабарончай дзейнасці ў Беларусі.

Кіраўнік праваабарончага цэнтра «Вясна» Алесь Бяляцкі быў арыштаваны ў жніўні мінулага года па абвінавачванні ва ўхіленні ад выплаты падаткаў. Падставай паслужыла інфармацыя аб замежных банкаўскіх рахунках праваабаронца, якую беларускія ўлады атрымалі з Літвы і Польшчы. Бяляцкі быў прызнаны вінаватым і прысуджаны да чатырох з паловай гадоў турмы. Сам ён настойваў на сваёй невінаватасці, заяўляючы, што грошы, якія паступілі на рахункі, прызначаліся не для яго асабіста, а выкарыстоўваліся для патрэб цэнтра «Вясна».

Прэмія Петры Кэлі з 1998 года прысуджаецца асобам або групам асоб за актыўны ўдзел у барацьбе за захаванне правоў чалавека, негвалтоўнае разрашэнне канфліктаў і абарону навакольнага асяроддзя. Прэмія была заснавана ў памяць вядомай палітычнай дзяячкі, якая брала ўдзел у стварэнні ў Германіі партыі «зялёных», Петры Кэлі (1947-1992). У апошнія гады ўзнагароды былі ўдастоены расейскі адвакат і праваабаронца Юрый Шмідт, кітайскі адвакат Чжан Сычжы, актывістка па абароне правоў чалавека і экалогіі з Кеніі Вангары Маатай, якая пазней стала лаўрэатам Нобелеўскай прэміі міру.