«Кашальку» Лукашэнкі адкрылі шлях на рынак Еўразвяза

Тры кампаніі, у якіх прадстаўлены інтарэсы Аляксандра Машэнскага, з 1 ліпеня атрымалі доступ на малочны рынак Еўразвяза.

Цікава, што незадоўга да гэтага Брусэль спрабаваў зрабіць Машэнскага «персонай нон грата" з-за яго кантактаў з сям'ёй дыктатара Лукашэнкі.

18 чэрвеня пастаянны камітэт Еўрапейскага звяза па харчовым ланцугу і здароўю жывёл даў дабро на пастаўкі сырога малака і малочных прадуктаў з Беларусі на рынак ЕЗ для чатырох беларускіх кампаній. «Пачынаючы з 1 ліпеня 2012 года экспартныя ліцэнзіі прадастаўляюцца ААТ «Верхнядзвінскі масласыраробчы завод», СП «Санта Брэмар», ААТ «Бярозаўскі сыраробны камбінат» і ААТ «Савушкін прадукт», гаворыцца ў англамоўным прэс-рэлізе амбасады Беларусі ў Нідэрландах. У паведамленні таксама адзначаецца, што «ў 2009-2011 гадах на гэтых прадпрыемствах прайшлі строгія праверкі еўрапейскімі экспертамі, якія атэстоўваць кампаніі на адпаведнасць нормам ЕС па бяспекі харчовых прадуктаў», перадае TUT.by.

Варта адзначыць, што «Санта Брэмар» і «Савушкін прадукт» з'яўляюцца асноўнымі актывамі бізнэсоўца Аляксандра Машэнскага. Прадстаўлен яго інтарэс і ў Бярозаўскім сыраробным камбінаце. У лістападзе мінулага года агенцтва ПРАЙМ распаўсюдзіла інфармацыю аб тым, што «Санта Брэмар» давёў сваю долю ў ААТ «Бярозаўскі сыраробны камбінат» да 13,6%, выкупіўшы ў «Белцяжмаша» пакет акцый за 1,2 млн даляраў. Доля дзяржавы ў БСК складае 40,6%. Астатнія акцыі належаць сельгаспрадпрыемствам і фізічным асобам. На днях дырэктар Бярозаўскага сыраробнага камбіната Уладзімір Папеня сказаў, што замежныя інвестары зацікаўлены ў куплі завода, «нават адбываецца невялікі конкурс». «Але я не ведаю, як дзяржава паступіць і каго пусціць. Сярод патэнцыйных інвестараў кампанія з Галандыі, ЕБРР, швейцарскі вытворца», - сказаў Папеня, словы якога прыводзіць БелаПАН.

Пікантны момант у гэтай пазітыўнай гісторыі складаецца ў тым, што Аляксандра Машэнскага хочуць зрабіць неўязным у Еўразвяз. Некалькі тыдняў таму друкаваны орган ЕЗ выданне EUobserver назваў брэсцкага бізнэсмена сярод тых, каго могуць закрануць санкцыі. Машэнскі скампраметаваў сябе, »згуляўшы важную ролю ў кампаніі Аляксандра Лукашэнкі на прэзідэнцкіх выбарах 2010 года і стаўшы трэцім па ўплывовасці алігархам пасля Пефціева і Чыжа», піша EUobserver. У 2010 годзе бізнэсмэн уваходзіў у лік давераных асоб кандыдата ў прэзідэнты Аляксандра Лукашэнкі.