Беларусь абскардзіць рашэнне МАК аб дыскваліфікацыі Астапчук

Беларускі бок рыхтуецца абскардзіць рашэнне Міжнароднага алімпійскага камітэта дыскваліфікаваць за допінг чэмпіёнку Алімпійскіх гульняў 2012 года ў штурханні ядра Надзею Астапчук.

Раней намеснік міністра спорту і турызму Чэслаў Шульга заявіў, што ў яго ведамстве Астапчук па-ранейшаму разглядаюць як алімпійскую чэмпіёнку. На думку прэс-сакратара прэзідэнта Паўла Лёгкага, спартсменку не варта пазбаўляць ордэна Айчыны III ступені, якім яна была ўзнагароджана за залаты медаль у Лондане. Дырэктар Нацыянальнага антыдопінгавага агенцтва Аляксандр Ванхадла паведаміў, што НАДА і Беларуская федэрацыя лёгкай атлетыкі правядуць уласнае расследаванне інцыдэнту, піша БелаПАН.

Сама спартсменка выказала здзіўленне выяўленнем у яе арганізме допінгу, паколькі ўсе спробы, узятыя да 30 ліпеня, былі адмоўнымі. У ходзе інтэрв'ю журналістам яна выказала некалькі версій: гэта магло быць помстай за перамогу кідальнікаў молата Івана Ціхана і Вадзіма Дзевятоўскага над Міжнародным алімпійскім камітэтам, пазбавіўшым іх медалёў пекінскай Алімпіяды; помстай з-за палітычнай сітуацыі ў Беларусі; рэалізацыяй пагрозы шантажу з боку аднаго з былых работнікаў федэрацыі.

Па неафіцыйнай інфармацыі, допінг выяўлены ў яшчэ аднаго беларускага ўдзельніка Алімпійскіх гульняў у Лондане. Яго прозвішча не называецца, але гаворка не ідзе пра медалістаў.