СМІ: «Саюзнае» неба - прахадны двор

Гісторыя са шведскім «плюшавым дэсантам» у Беларусі выклікае ў Расеі шмат пытанняў да Лукашэнкі.

Журналіст Антон Сурапін, які першым апублікаваў фатаграфіі шведскага «плюшавага дэсанта» з дэмакратычнымі лозунгамі, скінутага ў Беларусі ў ліпені, працягвае знаходзіцца ў СІЗА КДБ без прад'яўлення абвінавачвання. Сітуацыя не змянілася нават пасля таго, як Лукашэнка звольніў генералаў, якія дапусцілі парушэнне паветранай прасторы краіны, паведамляе расейскі інфармацыйны партал Вести MD.

Антона Сурапіна са Слуцка арыштавалі 13 ліпеня і змясцілі ў СІЗА КДБ. Яго падазраюць у дапамаганні незаконнаму перасячэнню мяжы, за што яму пагражаюць сем гадоў пазбаўлення волі. Падставай стала тое, што ён адным з першых апублікаваў у Інтэрнэце фатаграфіі плюшавых мядзведзяў з дэмакратычнымі лозунгамі, скінутых са шведскага самалёта, які ўварваўся ў паветраную прастору Беларусі.

Нагадаем, гэта было 4 ліпеня, на наступны дзень пасля святкавання Дня незалежнасці, на якім дэманстравалася ваенная моц краіны.

Улады доўга не прызнавалі гэты факт, нягледзячы на фота і відэаматэрыялы, якія яго пацвярджалі. Праз амаль тры тыдні яго прызнаў Аляксандр Лукашэнка і паабяцаў пакараць вінаватых. У аўторак яго прэс-служба паведаміла, што вінаватыя сілавікі знойдзеныя і пакараныя. Сваіх пастоў пазбавіліся старшыня Дзяржпамежкамітэта Ігар Рачкоўскі і камандуючы ВПС і войскамі СПА Зміцер Пахмелкін. Акрамя таго, пра «няпоўную службовую адпаведнасць» Лукашэнка папярэдзіў міністра абароны Юрыя Жадобіна і начальніка Генеральнага штаба Узброеных сіл - першага намесніка міністра абароны Пятра Ціханоўскага. Вымову атрымалі дзяржсакратар Савета бяспекі Леанід Мальцаў і старшыня КДБ Вадзім Зайцаў.

Грамадскасць чакае ў сувязі з адстаўкамі сілавікоў прасоўвання справы Сурапіна. Amnesty International прызнала яго вязнем сумлення. Шведскія арганізатары «плюшавага дэсанта» заявілі аб недатычнасці каго-небудзь з грамадзян Беларусі да адбытага і выказалі гатоўнасць даць адпаведныя паказанні.

Па абвінавачванні ў дапамаганні быў таксама затрыманы грамадзянін Беларусі Сяргей Башарымыў, які здаваў шведам кватэру. «З такім жа эфектам можна цяпер арыштаваць бармэна, які прадаў нам піва ў Менску», - пракаментаваў сайту charter97.org дзеянні афіцыйнага Менска адзін з пілотаў, які кіраваў самалётам-парушальнікам, Томас Мазэцці.

Эксперты ў Менску лічаць, што колькасць заложнікаў можа павялічыцца. Аляксандра Лукашэнку ўдарылі па самым хворым месцы, бо ён заўсёды казыраў як перад Расеяй, так і перад ЕЗ крэпасцю межаў. «Ты выдаткаваў 20 мільярдаў еўра на сістэму супрацьпаветранай абароны, якая не змагла заўважыць невялікі самалёцік з грузам плюшавых медзведзянятаў», - укалоў беларускага кіраўніка арганізатар «дэсанта» Пер Кромвел у адкрытым лісце Аляксандру Лукашэнке.

Дарэчы, у тое, што шведы арганізавалі такую ганьбу кіраўніку Беларусі з імкнення да перамогі дэмакратыі ва ўсім свеце, вераць не ўсё. Мясцовыя эксперты лічаць, што заказчыкам «падрыву» аўтарытэту беларускіх СПА магла быць і Расея, якая прагне мець козыр у перамовах з Лукашэнкам.

Віктар Літоўкін - адказны рэдактар «Независимого военного обозрения» так пракаментаваў сітуацыю: «Гісторыя са шведскім «плюшавым дэсантам» у Беларусі пры ўсёй анекдатычнасці сітуацыі мае цалкам канкрэтныя складнікі, якія сведчаць аб сур'ёзных недахопах у забеспячэнні бяспекі самой «саюзнай дзяржавы», а таксама яе саюзнікаў па АДКБ і Расеі. І тут аднымі пакараннямі службовых асоб, якія не заўважылі (па крайняй меры так спачатку гэта выглядала) і дапусцілі пралёт на тэрыторыю краіны чужога лёгкаматорнага самалёта, не абысціся».

«Пасля гэтага інцыдэнту стала зразумела, што сістэма СПА Беларусі як частка адзінай сістэмы СПА «саюзнай дзяржавы» не ў стане тэхнічна зафіксаваць парушэнне паветранай прасторы краіны лёгкаматорным самалётам, які манеўруе па вышыні і выкарыстоўвае ў сваіх інтарэсах рэльеф мясцовасці», - рэзюмаваў эксперт.