Наста Палажанка: «Дзень нараджэння па традыцыі сустракаю ў турме»

Нявеста палітвязня Зміцера Дашкевіча, намеснік старшыні «Маладога фронту» Наста Палажанка адзначае 2 жніўня свой 22-і дзень нараджэння.

З дзяцінства Наста памятае, што ў гэты дзень ніколі не магла павесяліцца ў фантане, бо ўсе яны былі занятыя дэсантнікамі, у якіх 2 жніўня сваё свята.

- У апошні час па традыцыі я адзначаю гэты дзень у турме, - распавяла Наста Палажанка у гутарцы з карэспандэнтам «Салiдарнасцi».

Наш званок застаў імянінніцу ў дарозе. Наста разам з адвакатам едзе ў калонію да Зміцера Дашкевіча. Віншавальную паштоўку ад каханага дзяўчына ўжо атрымала.

- На паштоўцы намалявана кветка. Зміцер спадзяецца ў наступным годзе падарыць мне сапраўдны букет.

З днём нараджэння з самай раніцы Насту павіншавалі сябры з «Маладога фронту», а таксама Аляксандр Фядута і Уладзімір Някляеў.

На днях Наста Палажанка была знятая з міліцэйскага ўліку з прычыны пагашэння судзімасці.

Нагадаем, Наста Палажанка была арыштаваная пасля акцыі 19 снежня 2010 года. Яе абвінавацілі ў «арганізацыі і ўдзеле ў масавых беспарадках». 20 траўня 2011 года дзяўчыну асудзілі на 1 год умоўна.

- На працягу года мне забаронена ўдзельнічаць у выбарах, набываць зброю і ўсынаўляць дзяцей, - усміхаецца Наста.