Der Tagesspiegel: У ФРГ праходзілі навучанне больш за 100 беларускіх сілавікоў

Акрамя таго, у Беларусі нямецкія паліцыянты навучалі 400 памежнікаў і міліцыянтаў.

На працягу некалькіх гадоў нямецкія паліцыянты праводзілі трэнінгі для беларускіх калег, паведамляе Deutsche Welle са спасылкай на нямецкую газету Der Tagesspiegel. Супрацоўніцтва звузілася пасля прэзідэнцкіх выбараў 2010 года ў Беларусі.

Па інфармацыі СМІ, паліцыя ФРГ некалькі гадоў запар навучала супрацоўнікаў сілавых ведамстваў Беларусі. З 2008 па 2011 гады не менш за 100 прадстаўнікоў беларускіх праваахоўных органаў прымалі ўдзел у трэнінгах у Германіі.

У прыватнасці, у 2009 і 2010 гадах для беларусаў былі праведзены пяць навучалых семінараў у Ніжняй Саксоніі, Бадэн-Вюртэмберге і Саксоніі. Акрамя таго, на тэрыторыі Беларусі нямецкія паліцыянты навучалі амаль 400 памежнікаў, кіруючых супрацоўнікаў органаў міліцыі і крыміналістаў.

На практычным прыкладзе

У лістападзе 2010 года беларускім міліцыянтам нават далі магчымасць некалькі дзён запар назіраць за працай паліцыі ў Германіі падчас транспарціроўкі ядзерных адходаў у сховішча ў Горлебене. У гэтай аперацыі ўдзельнічалі больш за 20 тысяч паліцэйскіх.

Мэтай трэнінгу было знаёмства беларускіх калег з вобразам дзеянняў нямецкай паліцыі, які ўлічвае інтарэсы грамадзян і заснаваны на празрыстасці. Аднак транспарціроўка радыеактыўных адходаў суправаджалася масавымі пратэстамі, і справа дайшла да сутыкненняў актывістаў з паліцыяй.

У ход былі пушчаныя дубінкі, вадамёты і газавыя балончыкі. Па дадзеных праціўнікаў атамнай энергетыкі, раненні атрымалі больш за 500 чалавек. А ўсяго праз месяц пасля гэтага трэнінгу, пасля прэзідэнцкіх выбараў у снежні 2010 года, беларускія сілы бяспекі жорстка разганялі мірныя пратэсты, нагадвае нямецкае выданне.

Дэманстрацыя дзеянняў ва ўмовах масавых мерапрыемстваў

Супрацоўніцтва з Менскам у падрыхтоўцы кадраў пацвердзіў прадстаўнік міністэрства ўнутраных спраў ФРГ. Паводле яго слоў, мэтай навучання было азнаёміць беларускіх міліцыянтаў са стандартамі ЕЗ на прыкладзе нямецкай паліцыі. Галоўнай тэмай былі дзеянні паліцыі ва ўмовах буйных мерапрыемстваў, у тым ліку спартыўных, паведаміў далей прадстаўнік ведамства.

Разам з тым ён адзначыў, што ў 2008 годзе ў Беларусі яшчэ можна было назіраць некаторыя прыкметы гатоўнасці да дэмакратычных рэформ. Аднак пасля прэзідэнцкіх выбараў у снежні 2010 года кантакты з Менскам былі рэзка звужаныя.

У сувязі са звальненнем у канцы ліпеня кіраўніка федэральнай паліцыі Матыяса Зегера ў нямецкім друку выказваліся здагадкі, што прычынай паслужылі яго кантакты з беларускімі органамі ўлады.