Праваабаронцы: Праверка подпісаў татальна закрыта для назіральнікаў

У Беларусі працэдура праверкі подпісаў, сабраных за вылучэнне кандыдатам у дэпутаты, застаецца закрытай і непублічнай.

Аб гэтым заявіў каардынатар кампаніі «Праваабаронцы за свабодныя выбары» Валянцін Стэфановіч 27 жніўня на прэс-канферэнцыі ў Менску, піша БелаПАН.

«Гэта носіць сістэмны характар, на ўсіх «выбарах» назіраецца адна і тая ж карціна, - адзначыў ён. - І ў сувязі з тым, што ў назіральнікаў няма магчымасці прысутнічаць пры праверцы подпісаў, мы не можам казаць пра тое, наколькі працэдуры праверкі подпісаў былі аб'ектыўныя і адпавядалі Выбарчаму кодэксу».

Пры гэтым Стэфановіч падкрэсліў, што падчас цяперашняй выбарчай кампаніі праглядаецца тэндэнцыя, калі «не подпісы прызнаваліся несапраўднымі, а гаварылася, што дата ў падпісным лісце прастаўленая другой рукой, таму яны несапраўдныя».

Стэфановіч адзначыў, што адмоўлена ў рэгістрацыі кандыдатам у дэпутаты 122 прэтэндэнтам (24,6% ад агульнай колькасці вылучаных). Адмоўлена 19,5% прэтэндэнтаў, вылучаных апазіцыйнымі партыямі - Партыяй БНФ, АГП, БСДП (Грамада) і Беларускай партыяй левых «Справядлівы свет». Больш за ўсё было адмоў прэтэндэнтам, якія вылучаліся шляхам збору подпісаў, - 56%.

«Абсалютна прахаднымі апынуліся тыя, хто вылучаўся адразу ад двух суб'ектаў (ад грамадзян шляхам збору подпісаў і ад працоўных калектываў), - яны 100% зарэгістраваныя. Як правіла, менавіта такім шляхам ідуць тыя кандыдаты, якіх падтрымлівае ўлада», - сказаў Стэфановіч.