Алег Волчак: Інтэрпол не ўпершыню «пакрывае» беларускіх сілавікоў

У 2010 годзе эксперт міжнароднай арганізацыі пацвердзіў «віну» Мікалая Аўтуховіча ў падрыхтоўцы тэракту.

Гэтыя высновы былі абвергнутыя нават у беларускім судзе, перадае «Радыё Свабода».

Нагадаем, кіраўнік Інтэрпола Рональд Ноўбл назваў Зміцера Канавалава, меркаванага смяротніка, «тэрарыстам» за чатыры месяцы да суда. Абодва падазраваных былі асуджаныя і ў сакавіку гэтага года расстраляныя.

Афіцыйная версія была падвергнутая сумневу журналістам ВВС Джонам Суіні, які таемна прыбыў у Беларусь і сустрэўся з маці Уладзіслава Кавалёва. Любоў Кавалёва паведаміла яму, што маладыя людзі прызналіся ў падрыхтоўцы і здзяйсненні выбуху толькі пасля таго, як былі падвергнутыя катаванням у турме КДБ. Суіні распавёў аб яе прэтэнзіях да ходу следства ў рэпартажах, а таксама ў электроннай кнізе.

Гэта выклікала лютасць Інтэрпола, які абвінаваціў Суіні ў «прадузятых спекуляцыях» і «ілжывых і ўводзячых у зман заявах». На сайце Інтэрпола апублікавалі дакументальны фільм аб выбуху ў Менску, які быў зняты Беларускім тэлебачаннем, каб паказаць «сілу доказаў, атрыманых у ходзе крымінальнага расследавання».

Некалькі дзён таму дэпутат Бундэстага Марылуіза Бек абвінаваціла Інтэрпол у «змове» з Лукашэнкам.

Былы следчы пракуратуры, праваабаронца Алег Волчак згадаў, што да паслуг экспертаў Інтэрпола беларускія сілавікі звярталіся і ў справе Мікалая Аўтуховіча, суд над якім праходзіў у 2010 годзе. Алег Волчак згадаў, што ў Менск спецыяльна быў запрошаны эксперт Інтэрпола Марцін Фінке, якому, насуперак беларускаму заканадаўству, паказалі частку матэрыялаў справы. Потым афіцыйныя органы спасылаліся на высновы эксперта, які пагадзіўся з меркаваннем следчых аб падрыхтоўцы Аўтуховічам тэракту супраць старшыні Гродзенскага аблвыканкама. Аднак у судзе гэтыя высновы не пацвердзіліся, нагадвае Алег Волчак.

У справе пра тэракт, на думку Алега Волчака, Інтэрпол павінен быў дыстанцыявацца ад высноў беларускіх следчых: «Ім чыста тэхнічна перадалі нейкія дадзеныя, а яны павінны былі адказаць, але вельмі вузка, толькі ў рамках пытанняў. Але рабіць заявы аб даказанасці віны гэтых людзей было залішне. Гэта непрафесійна, ды і наогул ставіць пад удар імідж Інтэрпола як сур'ёзнай арганізацыі, якая шмат робіць у справе барацьбы з міжнароднай злачыннасцю».

У беларускім бюро Інтэрпола адмовіліся каментаваць заяву дэпутата Бундэстага Марылуізы Бек адносна супрацоўніцтва Інтэрпола з беларускім рэжымам.