Кандыдат ад БНФ абвясціў у эфіры БТ аб зняцці з «выбараў»

Па словах Аляксандра Рамановіча, адбудзецца гэта, калі не выпусцяць палітвязняў і не зменіцца аўтарытарны стыль кіравання краінай.

30 жніўня па тэлеканалу «Беларусь-2» паказалі выступы кандыдатаў у «дэпутаты» па Пінскай гарадской выбарчай акрузе № 14. Аляксандр Рамановіч, кандыдат ад партыі БНФ, у сваім выступе адзначыў, што «выбары» фактычна фармальныя, выбарчыя камісіі фармуюцца непразрыста і з членаў аднаго працоўнага калектыву, «дэпутатаў» фактычна прызначаюць і аўтарытарны рэжым не хоча бачыць у «парламенце» апазіцыю.

Потым Рамановіч прарэкламіраваў так званую «Народную праграму», якую распрацавалі спецыялісты з альтэрнатыўнымі поглядамі на развіццё краіны, піша ПЦ ПЦ «Вясна».

Напрыканцы выступлення Аляксандр Рамановіч заявіў, што не хоча ўдзельнічаць у выбарчым фарсе і, калі не выпусцяць палітвязняў і не зменіцца аўтарытарны стыль кіравання краінай, ён здыме сваю кандыдатуру.

Больш за тое, 30 жніўня на экстрана скліканым пасяджэнні Жодзінскай акруговай выбарчай камісіі была разгледжана заява кандыдата ад ЛДПБ Аляксандра Чарапка, які папрасіў ануляваць яго рэгістрацыю з простай фармулёўкай - «у сувязі з сямейнымі абставінамі».

Камісія аднагалосна прагаласавала за прызнанне названай ў заяве падставы ўважлівай і прыняла рашэнне ўнесці неабходныя змены ў выбарчыя бюлетэні.