Пачалося?

У віцебскіх абменніках няма валюты.

У рэдакцыю сайта charter97.org звярнуўся чытач з Віцебска, які паскардзіўся на адсутнасць валюты ў абменніках. Мы абтэлефанавалі філіялы «Беларусбанку» у гэтым горадзе і даведаліся, што даляраў сапраўды практычна не засталося.

Ва ўсіх аддзяленнях банка мы задавалі адно пытанне - ці можна ў вас купіць некалькі сотняў даляраў?

«Валюты не застаецца, людзі актыўна ўсе скупляюць. Пры наяўнасці абслужыць зможам. Калі даляры будуць - купіце, колькі будзе. Калі не будзе, то не купіце», - распавялі ў аддзяленні №200/13.

«Мы заяўкі па тэлефоне не прымаем. Калі валюта будзе, то купіце. Але тут наступны чалавек можа купіць усю валюту, якая засталася», - адказалі ў аддзяленні № 200/38.

«Ёсць праблемы з далярамі. Цяпер можа наступны кліент падыдзе і забярэ ўсе, што засталося. Так што нічога гарантаваць не можам», - сказалі ў чарговым філіяле.

«Не абяцаем. Пасля абеду падвязуць 3.000 даляраў, калі паспееце, то купіце», - адзначылі ў аддзяленні № 200/91.

У філіялах іншых банкаў нам таксама распавялі, што абяцаць прадаць даляры не могуць - валюты можа і не застацца.

Эканаміст Леанід Злотнікаў распавёў сайту charter97.org, што з-за недахопу ў краіне валюты курс даляра будзе расці.

«Нацбанк баіцца растрачваць золатавалютныя рэзервы (ЗВР) і не падкідвае банкам валюты. Калі б Нацбанк захацеў, ён мог бы прадаваць запасы насельніцтву, але тады ЗВР хутка б высіліліся і ў Беларусь вярнуўся крызіс, які быў у 2011-м годзе», - распавёў эксперт.

«Попыт людзей на валюту павялічыўся, таму даходы насельніцтва павысіліся на 15-20%. Натуральна, беларусы сталі купляць больш валюты, а таксама тавараў. Але колькасць тавараў не павялічылася так хутка, як зарплаты - за 8 месяцаў ВУП вырас толькі на 2,5%. Што тады атрымліваецца? Рэальныя даходы людзей павялічыліся на 20%, а колькасць тавараў - толькі на 2,5%», - адзначыў эканаміст.

«Імпартных тавараў не хапае, значыць трэба павялічваць аб'ём вытворчасці айчынных. Але для гэтага таксама патрэбная валюта, таму што беларуская вытворчасць прыкладна на палову складаецца з імпартных матэрыялаў», - падкрэсліў Леанід Злотнікаў.

«Падагульнім, рост даходаў насельніцтва цягне за сабой павелічэнне попыту на валюту і людзьмі, і прадпрыемствамі. І хтосьці павінен гэтую валюту ў краіне забяспечваць - ці за кошт экспартных прадпрыемстваў, якія прадаюць тавары за мяжой, ці за кошт знешніх даўжнікоў, альбо ж за кошт золатавалютных рэзерваў», - лічыць эксперт.

«Трэба адзначыць, што валавая знешняя пазыка Беларусі скарацілася на 1,5 мільярда даляраў - гэта значыць, адток валюты з краіны перавысіў яе прыток. Калі валюты на рынку прапануецца больш, чым людзі купляюць - то курс даляра падае. А калі прапанова валюты менш, чым попыт на яе - то курс даляра расце. Калі нічога не зменіцца, курс даляра будзе расці», - сказаў эканаміст.