Праваабаронцы: 78% назіральнікаў не дапусцілі да падліку галасоў

У офісе праваабарончага цэнтра «Вясна» адбылася прэс-канферэнцыя кампаніі «Праваабаронцы за свабодныя выбары».

Гэта сумесная ініцыятыва праваабарончага цэнтра «Вясна» і Беларускага Хельсінкскага камітэта. На прэс-канферэнцыі выступілі Валянцін Стэфановіч і Алег Гулак, перадае «Радыё Свабода».

Кампанія «Праваабаронцы за свабодныя выбары» заявіла, што выбарчы працэс прайшоў з сур'ёзнымі парушэннямі прынцыпаў дэмакратычных і справядлівых выбараў, якія замацаваны стандартамі АБСЕ і беларускім заканадаўствам.

На этапе агітацыі кампанія адзначыла сур'ёзнае выкарыстанне адміністрацыйнага рэсурсу ў мэтах падтрымкі праўладных кандыдатаў. У першыя дні датэрміновага галасавання колькасць тых, хто прагаласаваў датэрмінова нязначна адрознівалася ад той інфармацыі, якую давалі афіцыйныя дадзеныя. Розніца паміж дадзенымі афіцыйнымі і дадзенымі незалежных назіральнікаў складала тады ўсяго 10,4%. Але ў дзень «выбараў» гэтая лічба склала 18,8%. «Праваабаронцы за свабодныя выбары» заявілі, што з такімі дадзенымі няма даверу да «выбараў» у «парламент».

У асноўным датэрмінова галасавалі студэнты, жыхары інтэрнатаў, ваеннаслужачыя, супрацоўнікі дзяржаўных прадпрыемстваў. Прыкметамі прымушэння да ўдзелу ў датэрміновым галасаванні былі просьбы выбаршчыкаў да членаў выбарчай камісіі выдаць даведку аб удзеле ў галасаванні, арганізаваны прывоз выбаршчыкаў на ўчасткі для галасавання.

Умяшанне іншых асоб у працу выбарчага камітэта адзначана ў сярэднім на 20% выбарчых участкаў.

Больш за 70% назіральнікаў з кампаніі «Праваабаронцы за свабодныя выбары» адзначылі, што падлік галасоў адбываўся непразрыста: галасы лічылі ўсе члены выбарчай камісіі адначасова, кожны апрацоўваў толькі сваю стопку выбарчых бюлетэняў, перадаючы лічбы старшыні камісіі. Пры такой працэдуры ні назіральнікі, ні кожны асобны член выбарчай камісіі не ведалі агульнага выніку падліку галасоў на ўчастку. Акрамя таго, назіральнікі не знаходзіліся на такой адлегласці ад сталоў, з якой відаць, як вядзецца падлік.

78% назіральнікаў ад гэтай кампаніі заявілі, што не мелі магчымасці сачыць за падлікам галасоў.

Усяго Валянцін Стэфановіч адзначыў, што пры правядзенні «выбараў» мы ўсё больш набліжаемся да савецкай сістэмы, і калі ацэньваць па шкале савецкай школы, то гэтыя «выбары» ён ацаніў у два балы.