«Мармуровае» мяса пускаюць на каўбасу

Ідэя Аляксандра Лукашэнкі наладзіць у Беларусі вытворчасць «мармуровага» мяса, мяркуючы па ўсім, абарочваецца каласальнымі стратамі.

Даручэнне Аляксандра Лукашэнкі наладзіць у Беларусі вытворчасць «мармуровага мяса» і «заваліць Маскву элітнымі гатункамі ялавічыны»... завалена.

Як паведамляе газета «Белорусская нива», за шэсць месяцаў гэтага года на мясакамбінаты паступіла больш за паўтары тысячы тон жывёлы спецыялізаваных мясных парод. Але ніякіх элітных паўфабрыкатаў на прылаўках не з'явілася. Па сутнасці, «мармуровае мяса», аб якім так клапаціўся Аляксандр Лукашэнка, было адпраўлена «у агульны кацёл», на каўбасу.

«Мармуровае» мяса атрымала сваю назву з-за раўнамерна размеркаваных тлушчавых праслоек ў цягліцавых тканінах маладых бычкоў, якія на зрэзе нагадваюць прыродны малюнак высакароднага каменя. Прычым чым іх больш, тым вышэй якасць прадукту. У працэсе падрыхтоўкі праслойка растае, напаўняючы мяса сокам, за кошт чаго яно набывае непаўторную пяшчоту і мяккасць.