Намеснік міністра ЖКГ: «Камуналка» будзе даражэць, але не цяпер

У бліжэйшы час тарыфы на жыллёва-камунальныя паслугі для насельніцтва не павялічацца.

Пра гэта заявіў намеснік міністра жыллёва-камунальнай гаспадаркі Беларусі Генадзь Трубіла. Паводле яго слоў, кошты ў жыроўках зменяцца ў адпаведнасці са спажытым грамадзянамі цяплом, калі наступіць ацяпляльны перыяд, піша БелаПАН.

На сёння пакрыццё насельніцтвам затрат на паслугі ЖКГ складае 21%, а пасля ўключэння ацяплення яго ўзровень знізіцца. Ён «не гатовы адказаць», які ўзровень кампенсацыі тарыфаў насельніцтвам плануецца ў 2013 годзе, аднак падкрэсліў, што ён павінен быць вышэй, чым ёсць на сённяшні дзень.

У сувязі з субсідаваннем галіны «на дзяржаву кладзецца вельмі вялікая нагрузка», а кошты на розныя тавары ў Беларусі несупаставімыя з коштам паслуг ЖКГ для насельніцтва, сказаў намеснік міністра на прэс-канферэнцыі 27 верасня.

У Міністэрстве жыллёва-камунальнай гаспадаркі таксама сцвярджаюць, што адмовіцца ад адключэння гарачага водазабеспячэння ў летнія месяцы пакуль немагчыма. Адмяніць гэтую практыку можна толькі тады, калі няма цэнтралізаванага гарачага водазабеспячэння.

- Але пакуль адысці ад прафілактычнага рамонту сетак няма магчымасці, мы абавязкова павінны яго праводзіць, - кажа прадстаўнік Міністэрства ЖКГ.