Канцэрт Вольскага адменены: памяшканне апячатана
16- 28.09.2012, 12:29
Новая «Арт Сядзіба» зачынена, не паспеўшы адкрыцца.
Канцэрт Лявона Вольскага, які павінен быў прайсці ў новым памяшканні творчай пляцоўкі «Арт Сядзіба», перанесены ў офіс БНФ.
Пачатак у 18.30. У канцэрце таксама прымае ўдзел саксафаніст і флейтыст Павел Аракелян, перадае «Радыё Свабода».
За дзень да мерапрыемства супрацоўнікі Міністэрства па надзвычайных сітуацыях апячаталі памяшканне, дзе планавалася правесці прэзентацыю.
«Учора ўвечары прыйшоў да будынка і ўбачыў апячатаныя дзверы. Адразу патэлефанаваў уладальніку, які пацвердзіў, што яго выклікалі да будынка і ў яго прысутнасці дзверы апячаталі супрацоўнікі МНС», - сказаў арт-дырэктар Павел Белавус.
«Усё вельмі проста: у сераду на generation.by выйшаў матэрыял, у якім распавядалася, што «Арт Сядзіба» адкрываецца ў новым месцы і першым мерапрыемствам у пятніцу будзе сустрэча з Лявонам Вольскім.
Матэрыял пайшоў па інтэрнэту, яго прачыталі «патрэбныя» людзі, патэлефанавалі ў адміністрацыю Фрунзенскага раёна, там адразу паніка, тыя накіроўваюць праверыць памяшканне МНС, а ўладальніка ставяць перад фактам, што новыя арандатары гэтага памяшкання не пажаданыя.
Такім чынам мы сёння адмянілі падпісаную дамову і новая «Арт Сядзіба» зачынена, не паспеўшы адкрыцца. Вось такая ланцуговая рэакцыя».
Нагадаем, Лявон Вольскі знаходзіцца ў спісе забароненых музыкаў у Беларусі.