Дэбаты адмянілі з-за... паломкі абсталявання на БТ

Тэлеканал «Беларусь 2» адмяніў запіс дэбатаў кандыдатаў у дэпутаты з-за паломкі абсталявання.

Пра гэта БелаПАН паведаміў лідэр Аб'яднанай грамадзянскай партыі Анатоль Лябедзька.

Паводле яго слоў, раніцай 3 верасня павінен быў адбыцца запіс яго дэбатаў з кандыдатам у дэпутаты і дзеючым «дэпутатам» Мікалаем Самасейкам. «Аднак мне патэлефанавалі і паведамілі, што па тэхнічных прычынах - з-за паломкі абсталявання - запіс адмяняецца», - сказаў Лябедзька.

Сам Лябедзька ў такую версію не верыць. «На мінулым тыдні я запісваў дэбаты таксама з дзеючым «дэпутатам» Святланай Шылавай. У маім выступе не было заклікаў да байкоту, але тое, што ў нас няма выбараў, няма парламента - гэта я агучыў, і наша жорсткая пазіцыя была выказана. Шылава, я лічу, у дэбатах выглядала вельмі бледна. Таму альбо зараз тэлеканал тэрмінова арганізуе курсы па вучобе праўладных кандыдатаў па выступу перад камерай, альбо думае, што наогул рабіць з дэбатамі і як пазбавіцца ад такой непрыемнасці», - сказаў Лябедзька.

Хоць, на яго думку, «пяціхвілінныя дэбаты ў запісе - гэта і так ганебшчына для нашых «выбараў».

Па аналагічнай прычыне была адменена запіс дэбатаў кандыдата ў дэпутаты, падтрыманага кампаніяй «Гавары праўду!», Таццяны Караткевіч. Яна павінна была дыскутаваць з кіраўніком Менскага гарадскога савета «дэпутатаў» Міхаілам Савановічам і былым старшынёй Нацбанка Беларусі Станіславам Багданкевічам.

Як паведаміў кіраўнік выбарчага штаба кампаніі «Гавары праўду! » і давераная асоба Караткевіч Андрэй Дзмітрыеў, ён таксама меў намер прыняць удзел у дэбатах. «У апошні час па тэлеканале «Беларусь 2» можна было глядзець толькі футбол. Мабыць, альтэрнатыўных меркаванняў і непрыемных пытанняў апаратура не вытрымала», - сказаў ён.